Zingatieni maadili ya Utumishi wa Umma: Dkt.Haji Mnasi

Posted on: March 11th, 2024

Mkurugenzi Mtendaji Halmashauri ya Wilaya ya Siha Dkt.Haji Mnasi  awataka Watumishi wa Halmashauri kuendelea kutoa huduma bora kwa Wananchi pamoja na kuchapa kazi kwa bidii zaidi.

Kauli hiyo ameitoa leo jumatatu tarehe 11 Machi,2024 alipokutana na Watumishi wa Makao makuu ya Halmashauri ya Siha ikiwa ni sehemu ya utaratibu wake wa  kazi wa kuwa kukutana na Watumishi na kuwakumbusha mambo mbalimbali ya utendaji kazi.

"Napenda kuwashukuru Watumishi wote wa Halmashauri kwa utendaji Bora wa kazi mnaoendelea kufanya katika maeneo mbalimbali ya Wilaya yetu ila naomba kila mmoja wetu aongeze juhudi zaidi ili kuboresha utoaji wa huduma kwa Wananchi" alisema Dkt.Mnasi.

"Napenda kutoa wito kwa Watumishi wote kuzingatia nidhamu na maadili ya kazi hususani kuwahi kazini,matumizi ya lugha pamoja na kuvaa mavazi yanayokubalika katika utumishi wa umma" alisema na kuongeza Dkt.Mnasi.

Pia Dkt.Mnasi ametoa onyo kali kwa Watumishi wa Umma wenye tabia ya kutoa taarifa  mbalimbali za ofisi bila kufuata utaratibu waache tabia hiyo mara moja kwani ni kinyume cha kanunu za utumishi wa umma.

Dkt.Mnasi amewataka Watumishi wa Halmashauri kujua kuwa kila mmoja analojukumu la kusimamia na kuhakikisha mapato ya Halmashauri yanakusanywa kwa ukamilifu na amewaomba wale wote wanaona mapato yanapotea au kuibiwa watoe taarifa kwa haraka ili kudhibiti hali hiyo.