Kilimo, Ushirika na Umwagiliaji

IDARA YA KILIMO, UMWAGILIAJI NA USHIRIKA

Utangulizi

Halmashauri ya Wilaya ya Siha ina ukubwa wa eneo la Hekta 53,268 zinazofaa kwa Kilimo ambapo hadi sasa eneo linalolimwa ni Hekta 37,839. Mazao makuu ya chakula yanayolimwa ni Mahindi na Maharage na Mazao makuu ya biashara ni Kahawa na Shayiri. Mazao mengine yanayolimwa ni pamoja na Ndizi,Viazi Mviringo,  Matunda (Parachichi), Mboga (Karoti, Hoho, Nyanya, Njegere na aina nyingine za mboga), Mbaazi na Alizeti.

Idara ya Kilimo Umwagiliaji na Ushirika

Idara ya Kilimo, Umwagiliaji na Ushirika ni miongoni mwa Idara kumi na tatu (13) za Halmashauri ya Wilaya ya Siha ambayo wajibu wake ni kutoa  ushauri wa kitaalam kwa Wananchi katika kuboresha uzalishaji na tija kwa mazao ya Kilimo ili kujitosheleza kwa chakula na kuongeza kipato kwa Kaya.

Idara imegawanyika katika sehemu tatu ambazo ni sehemu ya Uzalishaji mazao (Kilimo), Umwagiliaji na Ushirika.

Lengo la Idara                                         

• Upatikanaji wa chakula cha kutosha na ongezeko la kipato kwa kaya

Mikakati ya  kufikia lengo 

• Kuratibu na kusimamia utekelezaji wa Miradi ya maendeleo iliyoibuliwa na wananchi ili kutatua changamoto wanazokabiliana nazo.
• Miradi hiyo ni pamoja na Ujenzi na ukarabati wa miundombinu ya umwagiliaji ili kuboresha upatikanaji wa maji ya umwagiliaji. Miradi iliyoboreshwa/kukarabatiwa ni Mfereji mkuu wa Umwagiliaji Mitimirefu, Mfereji mkuu wa umwagiliaji Namwai, Mfereji mkuu wa Umwagiliaji Wandri, Mfereji mkuu wa Umwagiliaji Mese, Mfereji mkuu wa Umwagiliaji Kasaisa, Mfereji mkuu wa Umwagiliaji Lawate, Ujenzi wa Bwawa na mfereji mkuu wa umwagiliaji Kishisha na Ujenzi wa Bwawa la Umwagiliaji Mowonjamu
• Kuboresha uzalishaji zao la Kahawa kwa kuanzisha bustani kubwa itakayoweza kuzalisha zaidi ya miche bora 1,000,000 kwa mwaka
• Kutoa mafunzo ya Kilimo bora cha mazao ya chakula na biashara kwa wakulima kupitia mashamba darasa, mashamba ya mfano, Kuandaa siku ya wakulima, kushiriki maonesho ya Nanenane na ziara za mafunzo 
• Kutoa elimu ya Kilimo biashara kwa vikundi vya  wakulima (kuongeza thamani mazao ya Kilimo na kuwaunganisha wakulima na masoko)
• Kuratibu na kusimamia usambazaji wa Pembejeo za Kilimo zenye ruzuku ya Serikali kwa wakulima wanufaika. Pembejeo zinazosambazwa ni pamoja na Mbegu bora za Mahindi, Mbolea ya kupandia na mbolea ya kukuzia
• Kutoa elimu kwa wakulima juu ya kupunguza upotevu wa mazao baada ya kuvuna (Post harvest losses)
• Kukusanya na kutunza Takwimu muhimu za uzalishaji wa mazao ya Kilimo
• Kutoa elimu ya matumizi bora ya Ardhi (Sustainable Land Management)
• Kukagua na kusimamia vyama vya Ushirika vya Mazao (AMCOS), Akiba na Mikopo (SACCOS)
• Kushirikiana na vituo vya Utafiti kusambaza teknolojia mpya za Kilimo kwa wakulima
• Kushirikiana na taasisi zisizokuwa za kiserikali (NGOs) katika usambazaji wa teknolojia mpya za Kilimo

Changamoto zinazoikabili Idara

• Upungufu wa rasilimali fedha za kutosha kutekeleza miradi yote ya maendeleo inayoibuliwa na wakulima
• Upungufu wa vitendea kazi kwa wataalam, Ngazi ya Kijiji, Kata na Wilaya. Vitendea kazi hivyo ni pamoja na usafiri ili kuwafikia wakulima kwa urahisi na vifaa vya kupima afya ya udongo (Soil Test Kits)
• Upungufu wa Maafisa ugani na maafisa Ushirika

Utatuzi wa Changamoto

• Kushauri Serikali kuu kuongeza ukomo wa bajeti (Budget Ceiling)  ya Sekta ya Kilimo ili kusaidia utekelezaji wa miradi na ununuzi wa vitendea kazi kwa wataalam
• Kuhamasisha asasi binafsi kutenga fedha kwa ajili utekelezaji wa miradi inayoibuliwa na jamii
• Halmashauri kutenga sehemu ya fedha za mapato ya ndani kusaidia utekelezaji wa miradi inayoibuliwa na wakulima
• Kuweka mpango wa mahitaji ya wataalam wa Kada mbalimbali