Waziri Jafo Awapongeza Viongozi Kilimanjaro Kwa Kuweka Mazingira Mazuri Ya Uwekezaji

Posted on: August 23rd, 2024

Siha - kilimanjaro

Waziri wa Viwanda na Biashara Mhe. Dkt Selemani Jafo amewapongeza viongozi wa Mkoa wa Kilimanjaro na Wilaya ya Siha kwa kuhakikisha wanaweka mazingira rafiki na mazuri ya kuratibu uwekezaji katika Mkoa.

Waziri Dkt Jafo ametoa pongezi hizo leo Agosti 23, 2024 alipotembelea eneo la uwekezaji la bustani ya wanyamapori ya Serval (Serval Wildlife) kwa ajili ya kujionea shughuli za uwekezaji katika sekta ya utalii uliofanyika katika Wilaya ya Siha.

Amesema baada ya Rais wa Jamhuri ya Muungano wa Tanzania Mhe Dkt Samia Suluhu Hassan kuitangaza nchi kupitia filamu ya The Royal Tour, fursa za uwekezaji zimeongezeka na serval wildlife wametumia fursa hiyo kwa manufaa ya wananchi wa Wilaya ya Siha na Taifa kwa ujumla.

“Niwapongeze sana viongozi wa Mkoa wa Kilimanjaro na Wilaya ya Siha kwa kuhakikisha wanaweka mazingira mazuri ya kuratibu uwekezaji na kusimamia usalama wa wageni wanapoingia katika maeneo haya ya uwekezaji kwani usalama ni jambo mhimu na sisi Tanzania ni kipaumbele chetu” amesema Mhe Dkt Jafo.

Waziri wa Viwanda na Biashara Mhe. Dkt Selemani Jafo na Viongozi mbalimbali wa wizara, mkoa wa kilimanjaro na wilaya ya siha leo Agosti 23, 2024 alipotembelea eneo la uwekezaji la bustani ya wanyamapori ya Serval (Serval Wildlife) kwa ajili ya kujionea shughuli za uwekezaji katika sekta ya utalii uliofanyika katika Wilaya ya Siha.

Kwa upande wake, Mkuu wa Wilaya ya Siha Mhe Dkt Christopher Timbuka amewahimiza wananchi kutumia muda wao wa mapumziko kufanya utalii wa ndani  katika bustani hiyo kwa kuona wanyama kwa karibu, kuwagusa  na kucheza nao ambao ni uzoefu tofauti na maeneo mengine ya uhifadhi.

Dkt Timbuka amesema maeneo ya uwekezaji katika wilaya ya siha yapo mengi katika sekta ya kilimo, mifugo, utalii, viwanda na biashara hivyo wawekezaji waendelee kutumia fursa hizo na viongozi wataendelea kutoa ushirikiano wa karibu muda wote.

Bustani ya wanyapori ya Serval Wildlife) ni kivutio cha utalii wa wanyamapori na utamaduni kilichopo Wilaya ya Siha Mkoa wa Kilimanjaro ambapo  ukiwa katika eneo hilo utakuwa na uwezo wa kukiona kilele cha Mlima Kilimanjaro na Mlima Meru.

Waziri wa Viwanda na Biashara Mhe. Dkt Selemani Jafo na Viongozi mbalimbali wa wizara, mkoa wa kilimanjaro na wilaya ya siha wakilisha na kukaa na wanyamapori leo Agosti 23, 2024 alipotembelea eneo la uwekezaji la bustani ya wanyamapori ya Serval (Serval Wildlife) kwa ajili ya kujionea shughuli za uwekezaji katika sekta ya utalii uliofanyika katika Wilaya ya Siha.