Watumishi wa Umma watakiwa kuwa Waadilifu

Posted on: December 12th, 2017

Watumishi wa Umma watakiwa kuwa waadilifu

Watumishi wa umma katika mamlaka za Serikali za mitaa pamoja na wale waliopo katika ngazi za mikoa wametakiwa kuwatumikia wananchi kwa uadilifu na uaminifu wa dhati.

Hayo yamesemwa na Fransi Mang’ira ambaye ni mratibu wa Utawala kwa Utumishi wa Umma Tanzania alipokutana na viongozi wa idara na vitengo wa Halmashauri ya Siha na Hai.

Kauli hiyo imetolewa tarehe 11.12.2017 katika ukumbi wa mikutano wa Halmashauri ya Wilaya ya Hai alipokutana na viongozi wa idara na vitengo na kutoa maelekezo mbalimbali ya jinsi ya kuboresha usimamizi wa kuboresha utoaji wa huduma kwa jamii.

Aliwataka watumishi wa umma kufanya kazi kwa kuzingatia sheria,taratibu,kanuni na miongozo mbalimbali iliyotolewa na serikali ya Jamhuri ya Muungano wa Tanzania.

Aidha,alieleza kuwa viongozi wa umma na watumishi wote wa umma wanapaswa kutambua majukumu yao ya kila siku na kuyatekeleza majukumu hayo kwa wakati kwa lengo la kuwapatia wananchi huduma zinazostahili na zenye viwango.

Serikali ya awamu ya tano chini ya Mhe.John Pombe Magufuli Rais wa Jamhuri ya Muungano wa Tanzania haitawavumilia watumishi wazembe,wavivu, wabadhirifu na wanaotoa huduma chini ya viwango kwa kisingizio cha aina yoyote alisema Fransis.

Akitoa neno la shukrani katika kikao kazi hicho cha siku moja,Kaimu Mkurugenzi mtendaji wa Halmashauri ya Siha Monica Sana aliwashukuru wataalam hao kwa maelekezo mazuri waliyoyatoa na kuwapa ahadi kuwa watumishi wa umma wa Halmashauri ya wilaya ya Siha wameyapokea na watayatekeleza maagizo na maelekezo yote ili kuboresha utoaji wa huduma kwa jamii.