WATUMISHI SIHA WATAKIWA KUTUMIA MFUMO MPYA WA PEPMIS

Posted on: November 23rd, 2023

Mkurugenzi wa mipango ofisi ya Rais, Menejimenti ya Utumishi wa Umma na Utawala Bora Cosmas Ngangaji amewataka watumishi wa Wilaya ya Siha kuanza kutumia mfumo wa usimamizi wa utendaji kazi kwa mtumishi wa umma (PEPMIS) ili kuboresha utendaji kazi na utoaji wa huduma kwa umma.

Ngangaji ametoa wito huo Novemba 23, 2023 baada ya mafunzo ya kuutumia mfumo huo mpya wa PEPMIS unaochukua nafasi ya mfumo wa wazi wa upimaji wa utendaji kazi kwa watumishi wa umma (OPRAS) uliokuwa ukitumika awali yaliyofanyika katika ukumbi mkubwa wa makao makuu ya Halmashauri ya Wilaya ya Siha huku akibainisha kuwa lengo la serikali la kutengeneza mfumo huo mpya ni kuchochea utoaji wa huduma bora katika jamii.

Amesema mfumo huo mpya utasaidia kufanya tathmini ya rasilimali watu katika Halmashauri ili kujua ziada na upungufu uliopo katika maeneo mbalimbali kwa kuangalia muda na utaalamu walionao watumishi wa umma.

“Kama serikali tunakuja na mfumo ambao utatusaidia kufanya maamuzi ya ajira mpya zinazohitajika na uhamisho ili kuhakikisha kwamba rasilimali watu zinakaa panapotakiwa na kwa idadi inayotakiwa” amesema Cosmas Ngangaji Mkurugenzi wa Mipango Ofisi ya Rais, Menejimenti ya Utumishi wa Umma na Utawala Bora.

Katika hatua nyingine, Mkurugenzi wa Mipango Ofisi ya Rais, Menejimenti ya Utumishi wa Umma na Utawala Bora Cosmas Ngangaji amesema mfumo huo unatumika kwa kila mtumishi ili kubaini uwajibikaji wao kila siku, wiki, mwezi hadi mwaka mzima kwani kila siku watumishi watatakiwa kuripoti walichofanya.

Malengo ambayo Ofisi ya Rais, Menejimenti ya Utumishi wa Umma na Utawala Bora ni kusanikisha mfumo wa usimamizi wa utendaji kazi kwa mtumishi wa umma (PEPMISI) katika halmashauri zote nchini ili isaidie kujenga mazingira ya uwazi na uwajibikaji hali itakayowasukuma watumishi kufanya kazi kwa bidii.

Kauli mbiu inayoongoza mabadiliko hayo yanayofanywa na serikali ni PEPMIS!!!  PEPMIS!!!  Tujenge Utumishi wa Umma Kidigitali.