Wanawake Siha Wapatiwa Mikopo ya Milioni 36

Posted on: May 29th, 2017

Wanawake Siha wapatiwa Mikopo ya Milioni 36

Halmashauri ya Wilaya ya Siha Mkoa wa Kilimanjaro imetoa kiasi cha shilingi milioni 36 kutoka mapato ya ndani kwa ajili ya kuwainua kiuchumi Wanawake wa Wilaya hiyo.

Mikopo hiyo yenye masharti nafuu imetolewa na Katibu Tawala Mkoa wa Kilimanjaro Mhe. Aisha Amour katika zoezi la utoaji wa mikopo lililofanyika tarehe 29.5.2017 katika ukumbi wa mikutano wa Halmashauri ya Siha.

Kabla ya kutoa mikopo hiyo, katibu Tawala mkoa wa Kilimanjaro ambaye alikuwa mgeni rasmi katika zoezi hilo,aliwataka Wanawake wa Wilaya ya Siha kuitumia mikopo hiyo kwa uangalifu na kwa malengo yaliyopangwa ili kuleta matokeo chanya ndani ya jamii na taifa kwa ujumla.

Aidha,Mhe.Aisha Amour aliagiza Halmashauri zote za Mkoa wa Kilimanjaro kuhakikisha kuwa zinatenga asilimia 10 ya mapato ya ndani kwa ajili ya mikopo ya Wanawake na Vijana.

Jumla ya vikundi 12 vya Wanawake vyenye wanufaika 249 vilipatiwa mikopo ya Shilingi milioni 3 kwa kila kikundi na viliahidi kutumia fedha hizo kwa malengo yaliyowekwa na kuirejesha mikopo hiyo kwa wakati . Fedha zilizotolewa na Halmashauri ya Wilaya ya Siha ni sehemu ya asilimia 5 ya Mapato ya ndani ya Halmashauri.

Katika mwaka huu wa fedha 2016/2017 Halmashauri ya Wilaya ya Siha kipindi cha mwezi Agost mwaka 2016 ilitoa Mikopo kwa vikundi 10 vya Wanawake Wilayani Siha vilivyokuwa na wanufaika 157 yenye thamani ya Shilingi milioni 20 ambapo kila kikundi kilipatiwa mkopo wa Shilingi milioni mbili.

Halmashauri ya Wilaya ya Siha ina jumla ya vikundi 532 vya kiuchumi na Ujasiriamali kwa Wanawake na Vijana,Vikundi hivi vinajumla ya Wanufaika wanachama 8730.

Halmashauri ya Wilaya ya Siha katika utekelezaji wa bajeti yake kila mwaka imekuwa ikitenga asilimia 5 ya Mapato ya ndani kwa ajili ya Mikopo ya Wanawake na asilimia 5 kwa ajili ya Vijana.

Baadhi ya Kina mama wa Siha wakisubiri mikopo katika Halmashauri ya Wilaya ya Siha