Wanaowapa Wanafunzi mimba kukiona :DC Siha

Posted on: August 6th, 2018

Wanaowapa wanafunzi mimba kukiona-DC Siha

Wanaume wanaosababisha mimba kwa wanafunzi wa shule za msingi na sekondari Wilayani Siha wapewa onyo kali kuacha tabia hiyo mara moja  ili kuepukana na  mkono wa sheria.

Hayo yamesemwa na mkuu wa Wilaya ya Siha mhe. Onesmo Buswelu  leo tarehe 6.8.2018  alipokuwa akitoa salamu za Serikali kwa wananchi katika msiba wa baba mkwe wa mbunge wa jimbo la Siha yaliyofanyika kijiji cha Magadini,kata ya Gararagua Wilayani hapa.

Mhe Onesmo Buswelu alisema kuwa wakati wa kukomesha tabia hiyo sasa umefika na serikali ya Wilaya ya Siha imejipanga kuwashughulikia wahalifu wote watakaohusika na tabia ya kuwakatisha masomo watoto wa kike kwa kuwapa utauzito .

“Ndugu zangu wananchi wa Wilaya ya Siha naomba mnisaidie kutoa taarifa kwa jeshi la polisi au kwangu binafsi kuhusu wanaume wanaosababisha mimba kwa watoto wetu wa kike hapa Wilayani Siha ili tuweze kufuta kabisa tabia hii” alisema Buswelu.

Wakati huo huo mkuu huyo wa Wilaya ya Siha alisema kuwa Serikali ya awamu ya tano imejipanga vema kuwahudumia wananchi wote na kuhakikisha kuwa  wananchi wanapata maendeleo ya kweli na yasiyo na vikwazo vya aina yoyote.

Katika salamu zake kwa wananchi wa Wilaya ya Siha Mhe Onesmo Buswelu pia aliwashukuru wananchi wa Wilaya ya Siha kwa ushirikiano mzuri wanaoendelea kumpatia katika kuunga mkono jitihada za Serikali ya Jamhuri ya Muungano wa Tanzania za kuwaletea wananchi maendeleo.

Mazishi ya baba mkwe wa mhe Godwin Mollel Mbunge wa jimbo la Siha pia yamehudhuriwa na naibu waziri wa elimu,Sayansi,tekinolojia na ufundi  mhe. Ole Nasha ambaye pia ni mbunge wa jimbo la Ngorongoro.