Wananchi Wilaya ya Siha waendelea kuhesabiwa Sensa ya watu na Makazi 2022

Posted on: August 23rd, 2022

Wananchi na Wakazi wa Wilaya ya Siha Mkoa wa Kilimanjaro wameshiriki vema zoezi la sensa ya watu na makazi lililoanza maeneo yote ya Wilaya ya Siha Mkoa wa Kilimanjaro tarehe 23 Agosti 2022.

Mkuu wa Wilaya ya Siha mhe. Thomas Apson akishiriki zoezi la sensa la sensa akiwa nyumbani kwake Kitongoji cha Dachikona,Kijiji cha Wiri Kata ya Gararagua

Akizungumza mara  baada ya kuhesabiwa,Mkuu wa Wilaya ya Siha mhe. Thomas Apson amesema kuwa zoezi limeanza vizuri na linaendelea vizuri katika maeneo yote ya Wilaya ya Siha na hakuna tukio lolote la kukwamisha zoezi hili limeripotiwa.

Ametoa wito kwa Wananchi na Wakazi wa Wilaya ya Siha kuendelea kusubiri makarani wa sensa wapite katika kaya zao kwani zoezi hili linaendelea kwa  siku sita kuanzia tarehe 23 Agosti,2022 na hivyo wale ambao hawatafikiwa tarehe 23.8.2022 watafikiwa siku zinazofuata na hivyo wasiwe na shaka wala wasiwasi.

Naye Mwenyekiti wa Halmashauri ya Wilaya ya Siha mhe. Duncan Urassa amesema kuwa yeye ameshahesabiwa mapema leo tarehe 23 Agosti,2022 na ametoa wito kwa wakazi wa Wilaya ya Siha kutoa taarifa sahihi kwa makarani wa sensa wanaopita katika kaya ili taarifa hizo zisaidie Serikali yetu katika kupata mahitaji sahihi ya wananchi hususani huduma za afya,elimu, maji na huduma nyingine za kijamii.

mhe. Duncan Urassa mwenyekiti wa Halmashauri ya Wilaya ya Siha akishiriki zoezi la senya tarehe 23 Agosti 2022 akiwa nyumbani kwake Kijiji cha Ashengai kata ya Karansi

Baada ya kuhesabiwa pia Mkurugenzi Mtendaji wa Halmashauri ya Wilaya ya Siha Pendo Mangali  amewataka wananchi wa Wilaya ya Siha kutoa takwimu sahihi katika zoezi la sensa ya mwaka huu kwani maendeleo yatapatikana kwa kutumia takwimu sahihi na siyo vinginevyo.

 Mkurugenzi Mtendaji wa Halmashauri ya Wilaya ya Siha Pendo Mangali(kulia) akiwa na karani wa sensa nyumbani kwake kijiji cha Wiri Wilaya ya Siha  katika zoezi la sensa linaloendelea katika maeneo mbalimbali ya Wilaya ya Siha