Wananchi Siha na Wadau Wafanikiwa Kuudhibiti Moto Uliozuka Ranchi ya NARCO - West Kilimanjaro

Posted on: August 19th, 2024

Wananchi wa Wilaya ya Siha kwa kushirikiana na wadau mbalimbali wamefanikiwa kuudhibiti moto mkubwa uliozuka Agosti 18, 2024 majira ya Saa Saba Mchana katika Ranchi ya Taifa ya West Kilimanjaro na kuteketeza robo ya eneo la malisho ya mifugo.

Akizungumza leo wakati wa kuangalia eneo lililoathiriwa na kufanya tathmini ya maafa yaliyojitokeza kwa wananchi na wawekezaji Agosti 19, 2024 Meneja wa Ranchi ya Taifa ya West Kilimanjaro Raymond Lutege amesema eneo lililoungua linakadiriwa kufikia hekari 7827 na sehemu kubwa ni eneo linalotumiwa na wananchi kwa malisho pamoja na Mwekezaji wa Kampuni ya Tanzania Game and Livestock breeders.

Meneja Lutege amemshukuru Mkuu wa Wilaya ya Siha Mhe. Dkt Christopher Timbuka kwa kutafuta wadau waliosaidiana na Jeshi la Polisi na Jeshi la Zimamoto na Uokoaji Mkoa wa Kilimanjaro kuzima moto ili usisababishe athari kubwa zaidi.

“Tunamshukuru sana pia Mbunge wa Jimbo la Siha Mhe. Dkt Godwin Mollel na Mkurugenzi Mtendaji wa Halmashauri ya Wilaya ya Siha Dkt Haji Mnasi kwa kuwahamasisha wananchi wanaoishi maeneo jirani na Ranchi ya Taifa ya West Kilimanjaro kushirikiana nasi kuzima moto huo” amesema Meneja Lutege.

Amesema kupitia hamasa za viongozi wa vijiji jirani wananchi walijitokeza kwa wingi kushirikiana nasi kuzima moto huo ambao ulidhibitiwa majira ya Saa Nne Usiku wa kuamkia leo.

“Eneo kubwa lililoathirika ni eneo la vitalu vya wafugaji, ifahamike kuwa Ranchi ya West Kilimanjaro tuna jumla ya vitalu saba, na katika vitalu saba tumebaki na vitalu viwili na nusu ambavyo havikupata madhara ya moto” ameongeza Meneja Lutege.

Meneja wa Ranchi ya Taifa ya West Kilimanjaro Raymond Lutege amesema kwa kushirikiana na vyombo vya ulinzi na usalama wanaendelea kuchunguza chanzo cha moto huo na hatua zaidi zitachukuliwa kudhibiti matukio kama hayo kujitokeza.

Meneja wa Ranchi ya Taifa ya West Kilimanjaro Raymond Lutege leo Agosti 19, 2024 akimuonesha Katibu Tarafa wa Siha Magharibi Janeth Jonas Obedy maeneo yaliyoathirika na moto wakati wa kuangalia eneo lililoathiriwa na kufanya tathmini ya maafa yaliyojitokeza kwa wananchi na wawekezaji.

Muonekano wa eneo la Ranchi ya Taifa ya West Kilimanjaro lililoungua na  moto mkubwa uliozuka Agosti 18, 2024 majira ya Saa Saba Mchana katika Ranchi hiyo na kuteketeza robo ya eneo la malisho ya mifugo.