Wanafunzi 3042 kuhitimu elimu ya Msingi 2023 Wilaya ya Siha

Posted on: September 12th, 2023

Mkurugenzi Mtendaji wa Halmashauri ya Wilaya ya Siha Dkt Haji Mnasi  amesema jumla ya Wanafunzi 3042 ikiwa Wavulana ni 1443 na Wasichana ni 1599 wa darasa la Saba katika Wilaya ya Siha watafanya mitihani ya kitaifa ya kumaliza elimu ya msingi (PSLE) kwa mwaka 2023.

Dkt. Mnasi amesema hayo leo Septemba 12, 2023 katika ukumbi wa Halmashauri ya Siha wakati akizungumzia hatua iliyofikiwa kwenye maandalizi katika vituo 62 ( Vituo vya Serikali 54 na Vituo 8  visivyo vya Serikali) ambapo Mitihani huo unaotarajiwa kufanyika Septemba 13 – 14, 2023 ambapo amesema maandalizi yote  yamekamilika kwenye eneo la usimamizi,  ulinzi na usalama utakaowawezesha wanafunzi kufanya Mtihani kwa utulivu.

Amewataka Wazazi na Walezi kuongeza upendo na ukaribu kwa watoto watakaokuwa wanafanya mtihani  ili kuwawezesha kuwa na utulivu wakati wote wa mitihani huku akiwaomba wasimamizi kuwa waadilifu, waaminifu na wenye nidhamu wakati wote wanapotimiza wajibu wao.

“Kutakuwa na matokeo mazuri kama usimamizi utakuwa vizuri na wale watakaofanikiwa kuendelea  na masomo ngazi ya Sekondari watakuwa ni wale ambao wametumia vizuri uwezo wao na wataliwezesha Taifa kuwa na wasomi ambao wamepitia vigezo na viwango vyote“ amesema Dkt. Mnasi