Walimu watakiwa kutumia mbinu shirikishi katika ufundishaji mashuleni

Posted on: May 28th, 2019

1. Walimu wa shule za Sekondari watakiwa kuboresha kiwango cha elimu mashuleni kwa kutumia mbinu shirikishi katika kuwasilisha mada mbalimbali wakiwa darasani. 

walimu wakitoa mada mbalimbali katika mafunzo hayo

Kauli hiyo imetolewa na mkurugenzi Mtendaji wa halmashauri ya Wilaya ya Siha ndugu Valerian Juwal aliposhiriki kufungua mafunzo ya siku mbili kwa walimu 60 wa shule za Sekondari Wilaya ya Siha. 

mkurugenzi Mtendaji halmashauri ya Siha ndugu Valerian Juwal akifumgua mafunzo hayo ya walimu ktk ukumbi wa shule ya Sekondari Magnificat tarehe 27.5.2019

Akitoa neno la ufunguzi katika shule ya Sekondari Magnificat mapema tarehe 27.5.2019 Mkurugenzi wa halmashauri ya Siha aliwataka walimu kuendelea kulinda maadili ya kazi ya ualimu pamoja na kusoma kwa bidii ili kuwaongezea maarifa Wanafunzi waliopo mashuleni. 

"Mimi Nimefurahi sana kuona wadau mbalimbali wa elimu hasa mashiriki ya dini hasa Tume ya Kikristo ya huduma za Jamii idara ya elimu wakishirikiana na Chuo kikuu cha Mwenge Mjini Moshi" alisema Juwal

"Naomba wadau wengine wa elimu kuiga mfano huu wa Chuo Kikuu Mwenge pamoja na Tume ya Kikristo ya huduma za Jamii idara ya elimu kwa jinsi walivyoungana na Serikali ya Tanzania katika kuboresha sekta ya elimu hapa Nchini"aliongeza Juwal katika hotuba yake ya ufunguzi. 

washiriki wa mafunzo wakisikiliza kwa makini mada zilizowasilishwa ktk mafunzo hayo 

Naye Afisa elimu Taaluma idara ya elimu Sekondari Halmashauri ya Wilaya ya Siha mwalimu Joel Mgalula alitoa shukrani kwa wafadhili wa mafunzo hayo kwa walimu wa shule za Sekondari Siha. 

Alieleza kuwa halmashauri ya Siha mkoa wa Kilimanjaro itaendelea kushirikiana na Chuo kikuu cha Mwenge pamoja na Tume ya Kikristo ya huduma za Jamii idara ya elimu katika mpango wa kuwajengea uwezo na umahiri walimu wa sekondari ili kuboresha kiwango cha elimu Wilaya ya Siha. 

Mratibu wa mafunzo hayo  kwa niaba ya Tume ya Kikristo ya huduma za jamii ndugu David Marandu alisema kuwa mafunzo hayo ni endelevu na wamekusudia kuwafikia wadau wote wa elimu kuanzia ngazi ya Wilaya, Kata na ngazi ya shule hasa wadau wakubwa wakiwa ni walimu. 

Mwakilishi huyo alieleza kuwa katika kanda ya Kaskazini halmashauri zote zimeingizwa katika mpango wa mbinu shirikishi za ufundishaji mashuleni.

Zoezi hilo kwa wiki hii linafanyika katika Wilaya za  Siha  Mwanga, Meru, Karatu na Monduli ambapo kuchaguliwa kwa halmashauri hizi kumetokana na mjongeo chanya wa ufaulu katika mitihani ya Kitaifa kwa miaka ya hivi karibuni alisema na kuongeza Marandu. 

Mpango wa mafunzo ya mbinu shirikishi kwa mikoa ya kanda ya kaskazini imetolewa kwa muda wa miaka minne Sasa. 

Jumla ya walimu 60,wakuu wa shule 4,maofisa elimu Kata 2 na mdhibiti ubora wa shule mmoja kupatiwa mafunzo hayo ya siku mbili na baadaye mafunzo yatatolewa kwa walimu wote katika shule za Sekondari Wilayani Siha.