Wafanyabiashara Wilayani Siha kunufaika kiuchumi

Posted on: September 1st, 2023

WAFANYABIASHARA KUNUFAIKA WILAYANI SIHA

Katibu Tawala wa Wilaya ya Siha Mhe. Jeni Chalamila ameishukuru Taasisi isiyokuwa ya Kiserikali ya Shelter of Hope and Excellence Foundation (SHEFO) kwa kufungua kituo cha mafunzo kwa Wafanyabiashara wa Wilaya ya Siha na kuwahakikishia kuwa Serikali itashirikiana nao kwa ukaribu ili kufikia malengo ya kiuchumi.

Katibu Tawala Wilaya ya Siha akiwa katika Shule ya awali na Msingi Siha Leadership ambapo alizungumza kwa niaba ya Mkuu wa Wilaya ya Siha Agosti 31, 2023 wakati wa hafla ya utiaji saini  mkataba ushirikiano baina ya Taasisi ya  Shelter of Hope and Excellence Foundation (SHEFO) inayofanya shughuli katika  Wilaya ya Siha wakishirikiana na Taasisi ya UBORA kutoka nchini Marekani.

Mhe. Jani  Chalamila amesema Wilaya ya Siha itatoa ushirikiano wa kila hali  kwa Taasisi hizo ili kuwawezesha wananchi na Wakazi wa Wilaya ya Siha  kunufaika na makubaliano hayo muhimu kwa lengo la kuwajengea uwezo wafanyabiashara na wakulima.

Naye, Kaimu Mkurugenzi Mtendaji  wa Halmashauri ya Wilaya ya  Siha Mwalimu  Naomi Swai amesema kuanzishwa kwa kituo cha kutoa elimu ya biashara kwa wafanyabiashara wa Wilaya ya Siha kutasaidia Wananchi wa Wilaya ya Siha kuinuka kiuchumi.

Amesema Ofisi ya Mkurugenzi Mtendaji inathamini hatua na juhudi hizo na kuwahakikishia uungwaji mkono  ili tija kwa wananchi wa Wilaya ya Siha na Tanzania kwa ujumla ionekane hususani katika uzalishaji wa mali.

Kwa upande wake, Mwanzilishi wa Taasisi ya SHEFO Mch.Wariaeli Maphie amesema lengo la kuanzishwa kwa kituo hicho cha utoaji elimu ya biashara kwa jamii ya Wilaya ya Siha ni kuwasaidia wafanyabiashara wadogo na wakubwa  kupata ujuzi utakaowawezesha kufanya biashara zao kwa weledi na ufanisi zaidi tofauti na hali iliyopo hivi sasa.

Katibu Tawala wa Wilaya ya Siha Mhe. Jane Chalamila alitoa wito kwa Wananchi na Wakazi wa Wilaya ya Siha kuchangamkia fursa hiyo na kuwa chachu wa Mafanikio katika Mkoa wa Kilimanjaro na Tanzania kwa ujumla.