Viongozi Siha wapongezwa kwa usimamizi mzuri miradi ya maendeleo

Posted on: June 12th, 2024

Kamati ya siasa Wilaya ya Siha imeupongeza uongozi wa serikali ngazi ya wilaya ukiongozwa na Mkuu wa Wilaya Mhe Dkt Christopher Timbuka na Mkurugenzi Mtendaji Dkt Haji Mnasi kwa usimamizi mzuri wa miradi ya maendeleo inayotekelezwa kwa manufaa ya wananchi na wakazi wa Wilaya ya Siha.

Pongezi hizo zimetolewa leo Juni 13, 2024 na Mwenyekiti wa Chama cha Mapinduzi Wilaya ya Siha Wilfred Mosi wakati wa ziara ya kamati ya siasa Wilaya kukagua mradi wa ujenzi wa miundombinu ya kidato cha tano na sita katika shule ya sekondari Sanya Juu.

Shule ya Sekondari Sanya Juu imetekeleza mradi wa ujenzi wa vyumba vinne vya madarasa na matundu nane ya vyoo kwa thamani ya shilingi Milioni 114.7 pamoja na mradi wa mabweni mawili, vyumba saba vya madarasa na matundu 14 ya vyoo wenye thamani ya shilingi Milioni 464.4 baada ya kupokea fedha kutoka Serikali kuu.

Amesema ubora wa mradi na thamani ya fedha katika miradi hiyo inaonekana kutokana na usimamizi mzuri ambao viongozi wa Serikali ngazi ya Wilaya wanaufanya wakati wa utekelezaji wa miradi husika.

Amewaomba waendelee na usimamizi huo mzuri ili wananchi wa Wilaya ya Siha wanufaike na miradi kwa kupata huduma iliyokusudiwa na serikali baada ya kuleta fedha za miradi.