USIMAMIZI MIRADI YA MAENDELEO, UKUSANYAJI MAPATO NI LAZIMA – BI MWAMBETA

Posted on: July 29th, 2025

Mkurugenzi Mtendaji wa Halmashauri ya Wilaya ya Siha Bi. Hellen Mwambeta amewahimiza watendaji wa kata na vijiji kusimamia kikamilifu miradi ya maendeleo na ukusanyaji wa mapato ya ndani ya Halmashauri ili kuleta maendeleo kwa wananchi.

Bi. Hellen Mwambeta ametoa rai hiyo leo Julai 29, 2025 wakati akihitimisha kikao cha mafunzo elekezi ya matumizi ya mfumo wa usimamizi wa utendaji kazi katika utumishi wa umma (PEPMIS) na mfumo wa TAUSI kwa watendaji wa Kata na Vijiji yaliyofanyika katika ukumbi mkubwa wa mikutano wa makao makuu ya Halmashauri.

Amewasihi watendaji wa kata na vijiji kufanya ufuatiliaji karibu, usimamizi na wabunifu wa nyanzo vipya vya mapato ili kupanua wigo wa ukusanyaji na kuhakikisha hakuna upotevu wa mapato katika maeneo wanayoyasimamia.

“Tuimarishe vyanzo vilivyopo vya mapato na kuzuia uharibifu unaoweza kujitokeza ili kiendelee kuiletea Halmashauri mapato na kubuni vyanzo vipya vya mapato vilivyopo katika vijiji na kata” amesema Mkurugenzi Mtendaji Bi. Hellen Mwambeta.

Pia amewasisitiza watendaji kusimamia kwa ukaribu miradi ya maendeleo na kuwashirikisha wananchi kuanzia mwanzo wa mradi hadi unapokamilika kwa kuwasomea matumizi ya fedha za miradi kwenye vikao vya kata na vijiji.

Aidha, Bi. Mwambeta amesema bila ushirkiano wa watendaji wa vijiji na kata, timu ya menejimenti na jamii husika kunakwamisha shughuli za maendeleo hivyo kila mmoja anatakiwa kuwa tayari kutekeleza majukumu yake kwa ufanisi na kwa kushirikiana.

“Kwa hiyo Naomba tukawajibike, na tukazingatie sheria, kanuni na miongozo ili kufanikisha shughuli za maendeleo kwa wanananchi” amesema Mkurugenzi Mtendaji Bi. Hellen Mwambeta.

“Pia naomba tuwe waaminifu kwenye kusimamia miradi ya maendeleo, ukusanyaji wa mapato na mambo mengine yote ya kiutendaji, ukiwa na uaminifu na uadilifu utakuwepo, kwa hiyo tufanye kazi kwa uaminifu na uadilifu mkubwa” ameongeza Bi. Mwambeta. 

Kikao cha mafunzo elekezi ya matumizi ya mfumo wa usimamizi wa utendaji kazi katika utumishi wa umma (PEPMIS) na mfumo wa TAUSI kwa watendaji wa Kata na Vijiji kimefanyika ili kuongeza ufanisi na uwajibikaji wakati wa utekelezaji wa shughuli za serikali.

Wajumbe wa kikao cha mafunzo elekezi ya matumizi ya mfumo wa usimamizi wa utendaji kazi katika utumishi wa umma (PEPMIS) na mfumo wa TAUSI kwa watendaji wa Kata na Vijiji kilichofanyika leo Julai 29, 2025 katika ukumbi mkubwa wa mikutano wa makao makuu ya Halmashauri ya Wilaya ya Siha