THAMANI YA FEDHA KWENYE MIRADI INAONEKANA - DKT TIMBUKA.

Posted on: October 12th, 2023

Mkuu wa Wilaya ya Siha Mhe. Dkt Christopher Timbuka ameridhishwa na ubora na ufanisi wa ujenzi wa miradi ya idara ya Elimu Sekondari kwani thamani ya fedha katika miradi hiyo inaonekana.

Mhe. Dkt Timbuka amesema hayo leo Oktoba 12, 2023 wakati wa ziara ya Kamati ya Ulinzi na Usalama ya Wilaya ya Siha yenye lengo la kukagua miradi ya Maendeleo ili kubaini kasoro zinazojitokeza wakati wa utekelezaji na kuzitolea maelekezo ili zifanyiwe kazi.

Amesema thamani na ubora wa miradi ya maendeleo ni nzuri kwani inaonekana wazi na amewaelekeza wakandarasi wanaoshika kandarasi kuzingatia muda wa kukamilisha miradi kama inavyoelekezwa.

Akikagua ujenzi wa Mabweni Mawili, Matundu 15 ya Vyoo na Madarasa 7 katika Shule ya Sekondari Karansi Mhe. Dkt Timbuka amesema, "hapa thamani ya fedha inaonekana kutokana na ubora wa Mradi unavyoonekana lakini shida yao ni muda wa ukamilishaji wa mradi, Mafundi mnatakiwa kuongeza spidi ili miradi ianze kutumiwa na wanufaika"

Kwa Upande wake, Mkurugenzi Mtendaji wa Halmashauri ya Wilaya ya Siha Dkt Haji Mnasi amesema wataendelea kusimamia miradi yote inayotekelezwa ndani ya Wilaya ikamilike kwa ubora na kwa ufanisi.

Dkt. Mnasi amesema ofisi yake itashughulikia kwa haraka kila changamoto inayojitokeza wakati wa utekelezaji wa miradi hiyo ili isiwe kikwazo cha kukwamisha ukamilishaji wa miradi kwa wakati na kwa ubora.

Ziara ya Kamati ya Ulinzi na Usalama ya Siku tatu iliyoanza Jumanne Oktoba 10, 2023 imekamilika leo Oktoba 12, 2023 kwa kutembelea miradi ya Elimu ikiwa ni pamoja na Shule ya Sekondari Sikirari, Ormelili, Karansi na Kilimanjaro High School.