Tathmini ya utoaji elimu shule za Sekondari yafanyika

Posted on: August 28th, 2023

Mkurugenzi Mtendaji wa Halmashauri ya Siha Dkt Haji Mnasi  amewapongeza walimu wakuu wa shule za sekondari kwa kuhakikisha ufaulu wa wanafunzi wa kidato cha nne na kidato cha sita katika mitihani ya kitaifa unapanda kila mwaka.

Dkt Mnasi amesema hayo Agosti 22, 2023 katika kikao cha Tathmini ya utoaji elimu na utekelezaji wa KPI na maelekezo ya Mkoa wa Kilimanjaro ya utokomezaji wa Divisheni 0 na IV kilichofanyika katika shule ya sekondari Magnificat iliyopo kata ya Gararagua Wilaya ya Siha.

Amewataka walimu kufanya kazi kwa juhudi na weledi na kuboresha mara kwa mara mbinu za ufundishaji zitakazowawezesha wanafunzi kuelewa mada zinazofundishwa ili kusaidia ufaulu katika mitahani ya kitaifa kupanda na kupandisha nafasi ya ufaulishaji wa wanafunzi katika Mkoa wa Kilimanjaro.

Kwa upande wake, Mkuu wa Divisheni ya Elimu Sekondari Mwalimu Naomi Swai amesema lengo la kikao hicho ni kutathmini utoaji wa elimu na utekelezaji wa maelekezo ya Serikali kwa kuhakikisha wanasimamia maendeleo ya taaluma na kumuandaa mwanafunzi aliye elimika vizuri na ambaye atachangia katika maendeleo ya nchi na maendeleo yake mwenyewe.

“Tunazingatia maelekezo ya Serikali ya kuhakikisha kwamba tunasimamia vizuri taaluma na hii inashabiiana na lengo na dira ya nchi katika sekta ya elimu kumuandaa mwanafunzi aliye elimika vizuri na kuchangia maendeleo ya nchi” alisema Mwalimu Naomi Swai

Pia mwalimu Swai amewataka walimu kuwa na upendo kwa wanafunzi wakati wote wanapokuwa shuleni kwani utachagiza kujenga ukaribu kati yao na wanafunzi hali itakayopelekea kuongeza ufaulu wa wanafunzi katika mitihani ya ndani na kitaifa.

Kikao kazi cha Tathmini ya Vigezo vya Utendaji Kazi (KPI),  hali ya utoaji wa elimu katika Shule za Sekondari  na utekelezaji wa maelekezo ya Mkoa wa Kilimanjaro ya kuondoa Divisheni 0 na  IV kimefanya tathmini ya taaluma na kuweka mikakati ya kuongeza ufaulu wa wanafunzi wa kidato cha pili nan ne katika mitahani ya ndani na kitaifa mwaka huu.