TASAF yaendelea kuwa Mkombozi kwa Maisha ya Wananchi Siha

Posted on: July 4th, 2023

Kaimu Mkurugenzi wa Tanzania Social Action Fund (TASAF) Ndugu Fariji Mishael amewapongeza wanufaika 32 wa mpango wa kunusuru kaya maskini wa kijiji cha Naweru Kata ya Kashashi kwa kuanzisha miradi ikiwemo ya ufugaji, kilimo na biashara ndogo ndogo zinazowawezesha kuingiza kipato zaidi.

Ndugu Mishael ametoa pongezi hizo leo Julai 04, 2023 katika ziara ya wadau wa maendeleo ya  kukagua miradi inayotekelezwa na wanufaika wa miradi ya ajira ya muda na kuona manufaa yanayopatikana kwa walengwa katika elimu, afya na uchumi.

Amesema miradi wanayoanzisha ikiwemo ufugaji, kilimo na biashara ndogondogo utawawezesha kuwa na uchumi endelevu katika familia zao na kuwawezesha kuondoka kwa hiari ili kuwawezesha wengine kuingizwa katika mpango huo wa kunusuru kaya maskini.

Akisoma taarifa ya utekelezaji wa mpango wa kunusuru kaya maskini katika kijiji cha Naweru, Mtendaji wa Kijiji hicho Jackline Kimbe amesema katika kipindi cha kwanza cha awamu ya tatu ya TASAF kijiji kimepokea malipo ya awamu 39 kuanzia Julai – Agosti 2015 hadi Januari – Februari 2023.

Amesema kijiji cha Naweru kimepokea shilingi milioni 62,960,275/= kwa ajili ya uhawilishaji kwa walengwa na elimu inatolewa kwa walengwa juu ya  matumizi sahihi ya fedha hizo kabla ya kupokea.

Ziara hiyo ya wadau wa maendeleo ya siku mbili katika wilaya ya Siha imekamilika leo na kesho Julai 5, 2023 viongozi wa TASAF Kitaifa na Wadau wa maendeleo watafanya majumuisho ya ziara katika mkoa wa Kilimanjaro.