Siha yazindua Maktaba mpya

Posted on: November 28th, 2018

Halmashauri ya Wilaya ya Siha hatimaye imezindua maktaba ya kisasa ya vitabu vya ziada na kiada kwa ajili ya kuongeza maarifa kwa wananchi mbalimbali wa Wilaya ya Siha.

Uzinduzi wa Maktaba hiyo umefanywa na Mkuu wa Mkoa wa Kilimanjaro Dkt. Anna Elisha Mghwira tarehe 28/11/2018 katika Kata ya Karansi Wilayani Siha.

Katika hotuba yake iliyosomwa na Mkuu wa Wilaya ya Mwanga mhe. Haron Mbogo,Mkuu wa Mkoa wa Kilimanjaro alitoa pongezi za dhati kwa Kata ya Karansi kwa kuwa mfano katika kata zote mkoa wa Kilimanjaro  kwa kuanzisha  maktaba ya kisasa na iliyo na vitabu vyote muhimu.

Ukaguzi ukifanyika na viongozi mbalimbali kabla ya kuweka jiwe la msingi katika maktaba ya Vitabu Kata ya Karansi tarehe 28.11.2018

Alisema kuwa kwa kuwa Mkoa wa Kilimanjaro una historia ndefu katika elimu hapa nchini,hivyo wananchi wanatakiwa kuilinda historia hiyo kwa kuboresha elimu kuanzia ngazi ya kaya hadi Wilaya.

Akimkaribisha mwakilishi wa Mkuu wa mkoa wa Kilimanjaro,Mkuu wa Wilaya ya Siha Mhe Onesmo Buswelu alitoa wito kwa Halmashauri ya Siha kuiga mfano mzuri wa Kata ya Karansi na kama wataona wivu basi na ninyi muwe na Maktaba yenu ngazi ya Wilaya ili wananchi wapate maarifa.

"Natoa wito kwa wananchi wa Kata ya Karansi kutumia maktaba hiyo vizuri ili kuongeza maarifa ,badala ya baadhi ya watu kukaa vijiweni na kupoteza muda kwa kupiga soga na wengine kucheza michezo isiyo na faida kwa jamii" alisema Buswelu.

Maktaba ya Karansi ikionekana kujaa vitabu mbalimbali mara baada ya kuwekewa jiwe la msingi na Mh.  Anna Elisha Mghwira Mkuu wa Mkoa wa Kilimanjaro tarehe 28.11.2018

Kwa mujibu wa taarifa iliyosomwa na Mtendaji wa Kata ya Karansi ndugu Andrea Gunda kwa  mgeni rasmi mh. Mkuu wa Mkoa wa Kilimanjaro,Maktaba hiyo ina jumla ya vitabu zaidi ya elfu 20 ambapo vitabu hivyo vipo vya fani mbalimbali yakiwemo magazeti ya kila siku.