Siha yafanya ukaguzi wa kustukiza katika biashara mbalimbali

Posted on: December 11th, 2017

Siha yaazimisha siku ya uhuru wa Tanzania kwa ukaguzi wa biashara mbalimbali

Halmashauri ya Wilaya ya Siha mkoa wa Kilimanjaro imeazimisha siku ya Uhuru wa Tanzania kwa zoezi la ukaguzi wa uendeshaji wa biashara mbalimbali Wilayani hapa.

Zoezi hilo limefanyika chini ya usimamizi wa Mkurugenzi Mtendaji wa Halmashauri ya Siha Valerian Juwal ambaye alisaidia na timu ya Wataalam wa Halmashauri ya Siha ambapo zoezi limefanyika katika mji wa Sanya juu.

Maadhimisho ya kusherekea miaka 56 ya uhuru wa Tanzania yameazimisha siha kwa zoezi la ukaguzi wa biashara mbalimbali zinazoendeshwa sambamba na kutoa elimu kwa wananchi ya jinsi ya kuendelea kuboresha biashara zao kwa kuzingatia masharti na maelekezo ya kila biashara.

Katika zoezi hilo jumla ya wafanyabiashara 48 wamekaguliwa na timu hiyo ya wataalam,kati ya wafanyabiashara 48, wafanyabiashara 12 walikutwa na mapungufu katika biashara zao walipewa elimu na kutozwa faini ya shilingi elfu 50.

Miongoni mwa biashara zilizokaguliwa katika zoezi hilo ni pamoja na biashara ya chakula,maduka ya madawa ya binadamu na mifugo,maduka ya nyama,maduka ya vipodozi,nyumba za kulala wageni,maeneo ya kuuzia vileo , maduka ya bidhaa nyingine pamoja na gereji bubu zilizopo mji wa Sanya Juu.

Hata hivyo,wananchi wengi wa mji wa Sanya Juu wameipongeza Halmashauri ya Siha kwa kufanya ukaguzi huo wa kustukiza kwani utasaidia kuimarisha biashara zenye viwango katika Wilaya ya Siha.

Mkurugenzi Mtendaji wa Halmashauri ya Siha alieleza kuwa zoezi limefanyika kwa mafanikio makubwa na kwamba zoezi hilo litakuwa endelevu katika Wilaya ya Siha kwa lengo la kuwapa elimu ya kutosha wakazi na wananchi wa Siha.