SERIKALI YAJIPANGA KUTOKOMEZA KIFUA KIKUU NCHINi

Posted on: January 10th, 2025

Serikali kupitia wizara ya afya imejipanga kutokeza maambukizi mapya ya ugonjwa wa kifua kikuu – TB ifikapo mwaka 2030.

Hayo yamebainishwa leo Januari 10, 2024 na Waziri wa Afya Mhe. Jenista Mhagama kwenye uzinduzi wa bodi ya tatu ya Hospitali ya Maalum ya Taifa ya Magonjwa Ambukizi – Kibong’oto uliofanyika katika Ukumbi wa Mikutano wa Hospitali hiyo ambapo amesema ili kufikia adhma hiyo, Serikali imewekeza katika mashine za kiuchunguzi kubwa na ndogo kwa ajili ya kufanya uchunguzi wa awali wa magonjwa ambukizi kikiwemo kifua kikuu.

Pia amesema Serikali imezindua X-ray 10 za kidijitali zinazotembea na zilizowekewa akili mnemba na uwezo wa kufanya uchunguzi wa awali na kugundua vimelea vya ugonjwa wa Kifua Kikuu mahali popote lengo ni kusaidia kubaini na kuanza kutoa tiba kwa watakaobainika kuwa na vimelea hivyo.

Mhe. Mhagama amesema tayari serikali imeshazindua kampeni ya kuhamasisha wananchi wajitokeze kupima kusudi wawatambue wenye vimelea na kuanza matibabu mara moja.

“Uzuri wa ugonjwa huu unatibika, nimefanya ziara na kujionea wagonjwa ambao wametibiwa na kupona, na niwapongeze Hospitali ya Kibong’oto kwa sababu wao ndio waliofanya utafiti na kupelekea matibabu ya awali ya sindano za kila siku kuondolewa na kupunguza muda wa matibu kutoka miaka miwili hadi miezi 6 pekee” amesema Mhe. Jenista Mhagama.

Waziri wa Afya Mhe. Jenista Mhagama akizungumza kwenye uzinduzi wa bodi ya tatu ya Hospitali ya Maalum ya Taifa ya Magonjwa Ambukizi – Kibong’oto uliofanyika leo Januari 10, 2024 katika Ukumbi wa Mikutano wa Hospitali hiyo

Naye, Naibu Katibu Mkuu Wizara ya Afya Ismail Rumatila amesema dhamira ya Rais wa Jamhuri ya Muungano wa Tanzania Mhe. Dkt Samia Suluhu Hassan ni kuboresha huduma za afya na ustawi wa afya za wananchi.

Naibu Katibu Mkuu Wizara ya Afya Bw. Ismail Rumatila akizungumza kwenye uzinduzi wa bodi ya tatu ya Hospitali ya Maalum ya Taifa ya Magonjwa Ambukizi – Kibong’oto uliofanyika leo Januari 10, 2024 katika Ukumbi wa Mikutano wa Hospitali hiyo

Waziri wa Afya Mhe. Jenista Mhagama amezindua bodi ya tatu ya Hospitali ya Maalum ya Taifa ya Magonjwa Ambukizi – Kibong’oto ikiongozwa na Mwenyekiti wa bodi Prof. Mohamed Bakari aliyekuwa Mganga Mkuu wa Serikali kuanzia Septemba 2015 hadi Aprili 2020.

Mkuu wa Wilaya ya Siha Mhe. Dkt Christopher Timbuka akizungumza kwenye uzinduzi wa bodi ya tatu ya Hospitali ya Maalum ya Taifa ya Magonjwa Ambukizi – Kibong’oto uliofanyika leo Januari 10, 2024 katika Ukumbi wa Mikutano wa Hospitali hiyo