RC Kilimanjaro atoa pongezi kwa miundombinu bora ya kidato cha tano

Posted on: August 18th, 2023

RC Kilimanjaro atoa pongezi kwa Wilaya ya Siha 

Mkuu wa Mkoa wa Kilimanjaro Mhe. Nurdin Babu ametoa pongezi kwa  Mkuu wa Wilaya ya Siha,Mwenyekiti wa Halmashauri na  Mkurugenzi Mtendaji wa Halmashauri ya Siha  kwa usimamizi mzuri wa fedha za miradi ya maendeleo inayotekelezwa kwenye Wilaya ya Siha.

Mhe. Babu amesema hayo Agosti 16, 2022 katika ziara ya siku moja Wilayani Siha ya kutembelea miradi  mbalimbali hususani  Ujenzi wa miundombinu ya Kidato cha Tano mwaka 2023.

Mhe. Babu akiwa  katika Shule ya Sekondari Oshara amesema kuwa ujenzi unaendelea vizuri tena upo katika viwango bora na ametaka kazi hiyo kukamilika kwa haraka ili wanafunzi wa bweni waliopangwa waweze kupata mahali pazuri pa kulala na

Pia Mhe. Mkuu wa Mkoa ameipongeza Ofisi ya Mkurugenzi Mtendaji wa Halmashauri ya Wilaya ya Siha kwa uchaguzi mzuri wa mafundi wanaojenga kwa kuzingatia ubora wa majengo katika shule hiyo na thamani ya fedha iliyotolewa na Serikali kwa ajili ya Miradi hiyo inaonekana.

Mkuu wa Mkoa Mhe. Babu amesema Serikali ya Rais Samia  imekusudia kuondoa changamoto za Madarasa, Mabweni na Matundu ya Vyoo ili kuwawezesha Wanafunzi kujifunza katika mazingira bora na salama na walimu kutekeleza majukumu yao kwa ufanisi.

Kwa upande wake, Mkuu wa Wilaya ya Siha Mhe. Dkt Christopher Timbuka ameahidi kusimamia kwa ukaribu ujenzi wa miundombinu hiyo ili ikamilike mapema kwa ubora na viwango  vinavyohitajika.

Amesema Wilaya ya Siha itaendelea kuwatumia Mafundi wa ndani wanaotekeleza miradi ya maendeleo kwa ufanisi na kuzingatia maelekezo yanayotolewa na wataalamu wa ujenzi kutoka  Halmashauri ya Wilaya ya Siha.

Awali Mkuu wa shule ya Sekondari Oshara mwalimu Kilawe alisoma taarifa ya ujenzi alieleza kuwa shule hiyo ilipokea shilingi milioni 464.4 kutoka Serikali ya Rais Samia Suluhu Hassan

Akiwa Wilaya ya Siha, Mkuu wa Mkoa wa Kilimanjaro Mhe. Nurdin Babu ametembelea miradi ya Ujenzi wa Matundu 14 ya Vyoo, Vyumba 7 vya Madarasa na Mabweni Mawili, Ujenzi wa Ofisi ya Tarafa ya Ngarenairobi, Ujenzi wa Madarasa Manne na Matundu Matatu ya Vyoo katika Shule ya Msingi Ngaremji, kuzindua Baraza la Ardhi na Nyumba la Wilaya ya Siha na Ujenzi wa Zahanati ya Naibili.