NATAKA RIPOTI KILA SIKU MNASI (PhD)

Posted on: October 25th, 2023

Mkurugenzi Mtendaji wa Halmashauri ya Wilaya ya Siha Haji Mnasi (PhD) amemtaka Mhandisi wa Halmashauri ya Siha kumpa Ripoti kila siku iwapo mafundi walioshika kandarasi za ujenzi wa Shule Mpya ya Mkoa ya Waschana (Kilimanjaro Girls High School) wanafika eneo la kazi na kutimiza wajibu wao ili kuwachukulia hatua mapema wanaochelewesha ukamilishaji wa mradi huo.

Mnasi (PhD) ametoa agizo hilo leo Oktoba 25, 2023 wakati wa ziara ya kamati ya Fedha, Uongozi na Mipango ya kukagua miradi ya maendeleo inayotekelezwa katika Wilaya ya Siha.

Amemuelekeza Mhandisi wa Halmashauri ya Siha kutokumbatia changamoto yoyote inayojitokeza kwenye ujenzi wa Shule hiyo ili utatuzi wa haraka ufanyike pale inapojitokeza.

"Kama kuna fundi hafiki eneo lake la kazi na tumempa kandarasi sema mapema ili tumchukulie hatua, ikiwezekana tumvunjie mkataba kabisa mapema ili asitucheleweshe, usibaki na changamoto yoyote" amesema Mkurugenzi Mtendaji Haji Mnasi (PhD)

Halmashauri ya Wilaya ya Siha inatekeleza mradi wa Shule Mpya ya Mkoa ya Waschana (Kilimanjaro Girls High School) baada ya kupokea fedha kutoka Serikali Kuu Shilingi Bilioni 3 kwa awamu ya kwanza ili kukamilisha ujenzi wa Vyumba vya Madarasa, Maabara, Jengo la Utawala, Nyumba za Walimu, Nyumba ya kupumzikia (Sick Bay) na Mabweni.