Mwananchi atoa bure eneo la kujenga shule ya Msingi

Posted on: November 2nd, 2021

Mwananchi mmoja wa Kijiji cha Mwinuko Kata ya Makiwaru Wilaya Siha Mkoa wa Kilimanjaro ndugu Solomoni Lukumay  ametoa eneo lake la  ardhi bure lenye ukubwa wa hekari mbili kwa ajili ya ujenzi wa shule ya msingi kijijini hapo.

Mbunge wa Siha mhe.Dkt. Godwin Mollel(wa tatu kulia) akimpongeza ndugu Solomoni Lukumay(wa pili kulia)

Mwananchi huyo amefanya uamuzi huo mbele ya Mkutano wa hadhara kijiji hapo mwishoni mwa wiki baada ya kusikia kilio cha wananchi cha kutaka kujenga shule yao ya msingi ili kuwapunguzia usumbufu watoto wa kijiji hicho wanaokwenda umbali mrefu kusoma katika  vijiji vya jirani.

Kiongozi wa Kimila(kulia) akimpongeza ndugu Solomoni Lukumay (kushoto) kwa kutoa ardhi bure

Mbunge wa Jimbo la Siha na Naibu waziri wa afya mhe. Dkt. Godwin Mollel ameeleza kuwa Ndugu Solomoni Lukumay amefanya jambo la kuigwa na Wananchi wa Siha pamoja na Watanzania kwa ujumla kwa kuwa mzalendo wa kweli.

Baadhi ya Kinamama wakimpongeza ndugu Solomoni kwa kutoa eneo la ardhi kwa kijiji chao

Napenda nimshukuru sana ndugu yangu Solomoni mbele ya Wananchi wa Kijiji cha Mwinuko na mbele ya Wananchi wa Kata ya Makiwaru kwa tendo hili muhimu alisema mhe. Dkt. Mollel.

Diwani Kata ya Makiwaru mhe.Ezekiel Lukumay(wa pili kushoto) akiungana na Mbunge kumshukuru Solomon

Akiongea katika mkutano huo wa Kijiji cha Mwinuko,Diwani wa Kata ya Makiwaru mhe. Ezekiel Lukumay pia  amemshukuru ndugu Solomoni Lukumay kwa kutoa eneo lake bure na kuwa mfano wa kuigwa katika kijiji hicho.

Dkt. Godwin Mollel Mbunge wa Siha akisisitiza jambo katika mkutano huo

Amesema kuwa wananchi wa kijiji hicho wataendelea kumkumbuka kwa jambo alilolifanya la kuonesha upendo kwa wananchi wenzake na ametoa wito kwa wananchi wengine kuwa na moyo wa kujitolea katika masuala ya maendeleo ya  kijamii.