MILIONI 834.9 YATUMIKA KUBORESHA MAZINGIRA YA WATOTO KUPATA ELIMU WILAYA YA SIHA

Posted on: June 15th, 2024

Mkuu wa Wilaya ya Siha Mhe Dkt Christopher Timbuka amesema katika mwaka wa fedha 2023 – 2024 Wilaya ya Siha imepokea shilingi Milioni 834.9 kwa ajili ya kutekeleza miundombinu ya miradi ya elimu katika shule za Msingi.

Mhe Dkt Timbuka amesema hayo leo Juni 15, 2024 wakati wa maadhimisho ya siku ya motto wa Afrika Wilaya ya Siha yaliyofanyika katika shule ya awali na msingi Ormelili.

Amesema uboreshaji wa miundombinu katika shule ya msingi umewezesha uandikishaji watoto darasa la awali kufikia 3727, darasa la kwanza kufikia watoto 3466 na watoto wenye mahitaji maalum 32.

Amewasisitiza wazazi na walezi kuwapeleka shule watoto wenye mahitaji maalumu kwani wana haki za msingi sawa na watoto wengine ya kupata elimu na makuzi sahihi.

“Inawezekana katika maeneo yetu kupata elimu na makuzi sahihi endapo watoto wenye ulemavu wakipewa kipaumbele katika kupewa elimu na kupatiwa vitendea kazi na kushirikishwa katika Nyanja zote za maendeleo” amesema Dkt Timbuka.

Maadhimisho ya siku ya Mtoto wa Afrika kitaifa yanafanyika kesho Juni 16, 2024 Wilayani Bunda Mkoa wa Mara na mgeni rasmi atakuwa Waziri wa Maendeleo ya Jamii, Jinsia, Wanawake na Makundi Maalum Mhe Dkt Dorothy Gwajima yakiongozwa na kauli mbiu isemayo, “Elimu Jumuishi kwa Watoto: Izingatie Maarifa, Maadili na Stadi za Kazi”

Kaulimbiu hii inahimiza utoaji wa elimu inayowajumuisha watoto wote, isiyobagua mtoto kutokana na hali yake.

Aidha, Elimu hiyo ilenge kumpatia mtoto Maarifa (elimu bora na ufaulu), Maadili (maadili mema, uadilifu na hofu ya Mungu) na Stadi za Kazi (kazi za mikono ili kujenga ujuzi kulingana na umri wa mtoto)