Makusanyo ya Halmashauri ya Siha kufikia 1.5 Bil bajeti 2021/2022

Posted on: February 2nd, 2021

Baraza la Madiwani katika Halmashauri ya Wilaya ya Siha hivi karibuni limekutana katika kikao maalum cha bajeti na limepitisha mapendekezo ya bajeti ya Halmashauri ya Siha yenye jumla ya shilingi Bil. 19.4,ambapo katika fedha hizo makusanyo ya ndani ya Halmashauri yatafikia shilingi zaidi ya Bil.1.5 ikiwa ni ongezeko la shilingi milioni 300 kulinganisha na bajeti ya halmashauri ya Siha kwa mwaka 2020/2021.

Mkurugenzi Mtendaji wa Halmashauri ya Siha ndugu Ndaki Mhuli akiwasilisha bajeti ya Halmashauri kwa wajumbe wa Baraza la Madiwani Siha katika ukumbi wa mikutano wa Halmashauri,alisema kuwa kuongezeka kwa ukusanyaji wa mapato ya ndani ya Halmashauri  kwa asilimia 16 katika bajeti ijayo (2021/2022) kutasaidia katika utoaji wa huduma kwa jamii ikiwemo elimu,afya,miundombinu na maji.

Ameeleza kuwa halmashauri imeweka mkakati wa kusimamia ukusanyaji wa mapato ya ndani  kikamilifu  kwa kutumia mashine za kieletroniki na kuzuia mianya yote inayoweza kusababisha upotevu wa mapato.

naomba kutoa wito kwa wananchi,wadau wa maendeleo pamoja na Wah. Madiwani kuunga mkono kikamilifu  juhudi hizi za  dhati za Halmashauri  ya Siha ili kuhakikisha kuwa Wananchi wetu wanapata huduma bora na zenye viwango vinavyotakiwa,alisema Ndaki