Mafunzo ya shule salama yatolewa Wilayani Siha

Posted on: June 9th, 2023

Mafunzo ya shule salama yatolewa Wilayani Siha

Afisa Elimu Sekondari Halmshauri ya Wilaya ya Siha Mwalimu Naomi Swai amewataka walimu wa Shule ya Sekondari Sikirari iliyopo Kata ya Donyomurwak Wilaya ya Siha kutumia mafunzo waliyopewa kutatua changamoto zinazowakabili wanafunzi na kuongeza ufaulu shuleni hapo.

Hayo ameyasema leo Juni 9, 2023 katika Shule ya Sekondari Sikirari wakati akihitimisha mafunzo ya kuwajengea uwezo walimu shuleni hapo yaliyotolewa na Shirika la Elimu la Mwangaza kwa kushirikiana  Halmashauri ya Wilaya ya Siha.

Mwalimu Naomi Swai amesema mafunzo hayo yamelenga kuwajengea uwezo walimu huku yakijikita katika mada tano ambazo ni fikra, namna ya kushughulikia migogoro, utamaduni wa shule, sera ya ulinzi wa mtoto na unasihi na huduma kwa mteja (mwanafunzi).

''Mwisho wa siku sasa hizi mada zote kuanzia siku ya kwanza hadi ya tano, itawaweka vizuri, itawajengea uwezo wa kuifanya shule kuwa salama kwa wanafunzi wote na hata kwa ninyi walimu kwa vile eneo lenu, kumbukeni mna wajibu wa kuwa viongozi wa elimu, mnakuwa ni wazazi wa hao wanafunzi na mnakuwa wabobezi, kwa hiyo mafunzo haya yanaendelea kuwapa uwezo na umahiri katika kufundisha, kuwabeba wanafunzi pamoja na  kujielewa ninyi wenyewe'' amesema Mwalimu Swai. 

”Naomba pia kutoa wito na kuwaomba walimu wa shule hii ya Sekondari Sikirari kuwa mabalozi wazuri wa mabadiliko kwenye ufundishaji ili walimu wengine wajifunze kutoka kwenu” amesema na kuoingeza mwalimu Swai.

.