KLABU NA MABARAZA YA WATOTO SHULENI YANAJENGA UWEZO WA KUFIKIRI, KUJIAMINI NA KUJIELEZA - DKT MNASI

Posted on: June 15th, 2024

Mkurugenzi Mtendaji Halmashauri ya wilaya ya Siha Dkt Haji Mnasi amewahimiza wazazi na walezi kuwaruhusu watoto kushiriki katika klabu na mabaraza ya watoto mashuleni.

Akitoa maelezo kuhusu maadhimisho ya siku ya mtoto wa afrika yaliyofanyika leo Juni 15, 2024 katika shule ya msingi Ormelili, Dkt Mnasi amesema mtoto akishiriki katika mabaraza hayo yanamjengea uwezo wa kufikiri, kujiamini na kujieleza.

Amewaomba wazazi na walezi kuwasimamia watoto wanapotumia vifaa vya kielektroniki kama vile simu, intaneti, kompyuta na runinga ili kumuepusha mtoto kujiingiza katika maeneo hatari ya kufanyiwa ukatili wa mtandaoni.

Amesema matumizi ya vifaa vya kielektroniki yaliyopita kiasi yanaweza kusababisha uraibu kwa mtoto hali itakayochangia mtoto kukosa muda wa kujisomea, kujifunza na kusaidia kazi ndogondogo za nyumbani.

Pia ameiomba jamii ya Wilaya ya Siha kutoa taarifa ya vitendo vya ukatili kwa mtoto katika dawati la jinsia katika vituo vya polisi ili kupatiwa msaada.

Maadhimisho ya siku ya Mtoto wa Afrika kitaifa yanafanyika kesho Juni 16, 2024 Wilayani Bunda Mkoa wa Mara na mgeni rasmi atakuwa Waziri wa Maendeleo ya Jamii, Jinsia, Wanawake na Makundi Maalum Mhe Dkt Dorothy Gwajima yakiongozwa na kauli mbiu isemayo, “Elimu Jumuishi kwa Watoto: Izingatie Maarifa, Maadili na Stadi za Kazi”