KAMATI YA USALAMA WILAYA YAFANYA ZIARA YA KUKAGUA MIRADI YA MAENDELEO

Posted on: December 10th, 2025

ZIARA YA KUU

SHULE YA AWALI NA MSINGI WIRI: Mkuu wa Wilaya ya Siha Mhe. Dkt. Christopher Timbuka leo Desemba 08, 2025 ameiongoza Kamati ya Usalama Wilaya kukagua maendeleo ya ujenzi wa mradi wa vyumba viwili vya madarasa ya mfano ya awali na matundu sita (6) ya vyoo unaotekelezwa kwa fedha Shilingi Milioni 70.1 kutoka Serikali Kuu pamoja na ukamilishaji wa chumba kimoja (1) cha darasa kinachotekelezwa kwa Shilingi Milioni 20 kutoka Serikali Kuu katika shule ya Awali na Msingi Wiri iliyopo Kata ya Gararagua.

CHUO CHA UFUNDI STADI (VETA): Mkuu wa Wilaya ya Siha Mhe. Dkt. Christopher Timbuka ameiongoza Kamati ya Usalama Wilaya kufanya ukaguzi wa maendeleo ya ujenzi wa chuo cha ufundi stadi (VETA) unaotarajiwa kugharimu fedha Shilingi Bilioni 1.65 kutoka Serikali Kuu mpaka kukamilika kwake.

Majengo yanayojengwa katika awamu hii ni pamoja na nyumba ya mkuu wa chuo, jengo la utawala, vyumba vya madarasa, vyoo vya jumuiya, karakana ya ushoni na upishi, karakana ya useremala na uashi, karakana ya umeme na bomba, kibanda cha umeme na kibanda cha mlinzi.

ZAHANATI YA LOIWANG: Kamati ya Usalama Wilaya ikiongozwa na Mkuu wa Wilaya ya Siha Mhe. Dkt. Christopher Timbuka imeridhishwa na maendeleo ya ukamilishaji wa mradi wa ujenzi wa zahanati ya kijiji cha Loiwang iliyopo Kata ya Donyomuruak unaoyekelezwa na Serikali kwa Shilingi milioni 60.

Mradi huo uliibuliwa na wananchi wa Kijiji cha Loiwang kwa lengo la kusogeza na kuboresha huduma za afya kwa wananchi wanaoishi katika kijiji hicho na vijiji jirani huku serikali ikiwaunga mkono baada ya kunyanyua boma la zahanati ambapo Halmashauri kupitia mapato ya ndani ilitoa shilingi Milioni 15 ili kuwawezesha kuezeka jengo la zahanati.

Akizungumza baada ya kukagua maendeleo ya ujenzi wa mradi huo Mhe. Dkt. Christopher Timbuka amesisitiza spidi iongezwe ili kukamilisha mapema na ubora wa mradi uendelee kuzingatiwa wakati wote wa utekelezaji.

HOSPITALI YA WILAYA YA SIHA: Mkuu wa Wilaya ya Siha Mhe. Dkt. Christopher Timbuka ameiongoza Kamati ya Usalama Wilaya kufanya ukaguzi wa miradi ya maendeleo inayotekelezwa katika Hospitali ya Wilaya ya Siha ukiwemo mradi wa jengo la kuhifadhia (mortuary), njia za waenda kwa miguu (Walk way) na Wodi ya upasuaji Wanawake, Wodi ya upasuaji Wanaume na wodi la magonjwa ya ndani wanawake ambayo ukamilishaji wake umefanyika baada ya Serikali Kuu kutoa Shilingi Milioni 200 za ukamilishaji.

Pia kamati ya usalama imetembelea jengo la kufulia ili kuona mitambo ya kufua nguo, kukausha na kupiga pasi nguo zinazotumika hospitalini hapo ambavyo ufungaji wake umekalika.

SHULE YA AWALI NA MSINGI LOIWANG: Mradi wa ujenzi wa Vyumba viwili vya madarasa katika Shule ya Awali na Msingi Loiwang kupitia fedha za mapato ya ndani ya Halmashauri Shilingi Milioni 32.5 na Shilingi milioni 17.5 kutoka Serikali Kuu umekaguliwa leo na Kamati ya Usalama Wilaya ikiongozwa na Mhe. Dkt. Christopher Timbuka Mkuu wa Wilaya ya Siha.

Mradi huo unalenga kuboresha mazingira ya kujifunzia na kufundishia kwa wanafunzi na walimu katika Shule hiyo.