Hospitali ya Wilaya ya Siha yaboresha utoaji huduma za Afya

Posted on: May 12th, 2023

Hospitali ya Wilaya ya Siha kuboresha huduma za Afya 

Hospitali ya Wilaya ya Siha imeweka mpango mkakati wa kuboresha huduma za afya kwa lengo la kuhakikisha wananchi wanapata huduma bora na kwa wakati katika Hospital hiyo.

Kauli hiyo imetolewa hivi karibuni na Mganga Mkuu wa Hospitali ya Wilaya ya Siha  Dkt.Paschal Mbotta akiwa katika  kikao cha pamoja kati ya Wauguzi wa afya na viongozi wa Kata ya Sanya Juu  pamoja na Wenyeviti wa Vijiji vinavyozunguka Hospitali.

Katika kikao hicho Mganga mkuu wa Hospitali ya Wilaya ya Siha  Dkt Paschal Mbotta ametoa wito kwa  Madaktari na Wauguzi wa afya kuhakikisha wanatoa huduma bora kwa wagonjwa wanaofika kupata huduma .

Katika kikao hicho daktari Paschal Mbotta aliwaomba viongozi wa Kata ya Sanya Juu kuendelea kutoa ushirikiano katika kuboresha huduma za afya kwa wananchi wa Wilaya ya Siha na nje ya Wilaya yetu.

Diwani wa Kata ya Sanya Juu Mhe. Juma Jani alishukuru uongozi wa hospitali kwa kuwakutanisha na kuweka mpango na misingi imara ya kuboresha utoaji wa huduma za afya katika Hospitali ya Wilaya ya Siha.

"Tuendelee kutengeneza umoja na timu nzuri tukishirikiana, pale ambapo tunaona mambo hayaendi Sawa ili kuboresha huduma za afya katika hospitali yetu ya Wilaya alisema na kuongeza Mhe. Juma Jani Diwani Kata ya Sanya Juu.

Mganga Mkuu wa Hospitali ya Wilaya ametoa wito kwa wananchi kufika Hospitalini hapo na amewahakikishia mapokezi yaliyo bora kutoka kwa Madaktari na wauguzi ambao wamejitolea kuendelea kuwahudumia wananchi wa Wilaya ya Siha na Watanzania kwa ujumla.