Halmashauri ya Siha Yakusanya Mapato ya Ndani kwa Asilimia 147

Posted on: July 2nd, 2024

Mkuu wa Mkoa wa Kilimanjaro Mhe. Nurdin Babu ameipongeza Halmashauri ya Wilaya ya Siha kwa kukusanya mapato ya ndani kwa Asilimia zaidi ya mia moja kwa mwaka wa fedha 2023/2024.

Akizungumza wakati wa mkutano maalum wa kujadili hoja za mdhibiti na mkaguzi mkuu wa Hesabu za serikali leo Julai 02, 2024 uliofanyika katika ukumbi wa makao makuu ya halmashauri ya Wilaya ya Siha, Mhe Nurdin Babu amempongeza Mwenyekiti wa Halmashauri ya Wilaya ya Siha Mhe Duncan Urassa na Mkurugenzi Mtendaji Dkt Haji Mnasi kwa kuweka mikakati mizuri ya kuboresha ukusanyaji wa mapato.

Amesema ushirikiano uliopo kati ya Mkuu wa Wilaya, Ofisi ya Mkurugenzi Mtendaji, Mwenyekiti wa Halmashauri ya Wilaya ya Siha na Waheshimiwa madiwani umechagia kwa kiasi kiubwa kukusanya za mapato ya ndani kwa asilimia zaidi ya mia moja.

“Nitakuwa mchoyo wa fadhila, nilisema mnafanya vizuri sana, yani nyie watu wa Siha, katika watu ambao wanatuweka mbele sisi ni pamoja na nyie, makusanyo kufikia Juni 30, 2024 Halmashauri ya Wilaya ya Siha imekusanya kwa asilimia 147, mmekusanya vizuri “amesema Mhe Nurdin Babu.

“Nyie ni mashahidi waheshimiwa madiwani, kelele na maneno yopte yamekwisha, tulikuwa tunapata tabu sana miaka ya nyuma, miradi ya maendeleo ilikuwa inatekelezwa kwa michango ya wananchi kwa kiasi kikubwa, lakini kwa sasa Halmashauri ya Wilaya ya Siha inang’ara kila sehemu” ameongeza Mhe Nurdin Babu.

Kikao hicho cha kujadili hoja za Mdhibiti na Mkaguzi Mkuu wa Hesabu za Serikali – CAG kimefanyika ambapo Halmashauri ya Wilaya ya Siha imewasilisha hoja nane za ukaguzi zilizojadiliwa na kutolewa maelekezo na waheshimiwa madiwani mbele ya Mkuu wa Mkoa wa Kilimanjaro Mhe Nurdin Babu.