DED SIHA APONGEZWA KWA USIMAMIZI MZURI WA MIRADI YA MAENDELEO

Posted on: February 2nd, 2024

Mwenyekiti wa Halmashauri ya Wilaya ya Siha Mhe. Duncan Urassa ameipongeza ofisi ya Mkurugenzi Mtendaji kwa usimamizi mzuri wa miradi ya maendeleo inayotekelezwa katika wilaya ya siha.

Mhe. Urassa ametoa pongezi hizo leo Februari 02, 2024 wakati wa ziara ya kamati ya fedha, uongozi na mipango ya kukagua miradi ya maendeleo inayotekelezwa ndani ya Wilaya ambapo amesema kazi iliyofanyika katika Shule ya Sekondari ya Wasichana Mkoa wa Kilimanjaro (Kilimanjaro Girls) ni nzuri na thamani ya fedha inaonekana kwenye mradi.

Amesema Mkurugenzi pamoja na timu yake imefanya kazi kwa ufanisi ambapo mpaka sasa shule hiyo imepokea wanafunzi wa kidato cha kwanza kutoka Wilaya zote za Mkoa wa Kilimanjaro na wanasoma katika mazingira bora na salama.

“Kwa kazi iliyofanyika hapa Mkurugenzi unastaili kupongezwa, wakati tunaanza utekelezaji wa mradi huu watu hawakutegemea kama wanafunzi wangeripoti na kuanza masomo mara moja lakini wewe na timu yako pamoja na Mkuu wa Wilaya mkahamishia nguvu hapa, na sasa wanafunzi wameripoti na wapo darasani” amesema Mhe. Urassa.

Naye mkurugenzi Mtendaji Haji Mnasi, PhD amemshukuru mwenyekiti wa halmashauri kwa ushirkiano mkubwa anaotoa pamoja na waheshimiwa madiwani kwani ushauri na mapendekezo wanayotoa yamekuwa yakichagiza kwa kiasi kikubwa kuongeza ufanisi katika utekelezaji wa miradi ya maendeleo.

Amesema wakati wa utekelezaji wa miradi ya maendeleo mwenyekiti wa halmashauri amekuwa akifanya ziara za kushtukiza ili kushuhudia kazi inayofanyika maeneo ya miradi na kutoa ushauri na maboresho pale inapohitajika.

“Tukushukuru sana Mwenyekiti pamoja na timu yako ya Waheshimiwa Madiwani kwa ushirikiano mkubwa mnaotupa na mnapotupongeza maaana yake ni kwamba mnatupa nguvu ya kuendelea kufanya kazi nzuri kwa manufaa ya wananchi wa Wilaya ya Siha” amesema Mkurugenzi Mtendaji Mnasi.

Kamati ya fedha, uongozi na mipango imefanya ziara ya kukagua maendeleo ya ujenzi wa Nyumba ya Mkurugenzi Mtendaji, Shule ya Sekondari ya Wasichana ya Kilimanjaro, Hospitali ya Wilaya, Ujenzi wa Bweni katika Shule ya Sekondari Namwai, Ujenzi wa Kituo cha Afya na Ujenzi wa nyumba ya Mtumishi Zahanati ya Roseline.