DED SIHA AMPONGEZA MHE. RAIS KWA UWEKEZAJI MKUBWA SEKTA YA ELIMU

Posted on: January 31st, 2024

Mkurugenzi Mtendaji wa Halmashauri ya Wilaya ya Siha Haji Mnasi, PhD ameupongeza uwekezaji mkubwa unaofanywa na Serikali ya awamu ya Sita Chini ya uongozi wa Mhe. Rais Dkt Samia Suluhu Hassan katika sekta ya elimu kwa lengo la kuboresha ujifunzaji na ufundishaji.

Mnasi, PhD ametoa pongezi hizo leo January 31, 2024 wakati akifungua kikao kazi na wakuu wa shule za sekondari kilichofanyika katika shule ya sekondari ya wasichana Kilimanjaro ambapo amesema serikali imeweka mikakati inayohakikisha elimu ya sekondari inatolewa kwa ubora na ufanisi ili malengo ya nchi ya kuwa na raia walioelimika.

Amemshukuru Rais wa Jamhuri ya Muungano wa Tanzania Mhe. Dkt Samia Suluhu Hassan kwa uwekezaji mkubwa katika sekta ya elimu hasa katika halmashauri ya wilaya ya siha huku akiwataka viongozi katika sekta hiyo kumsaidia kwa kutekeleza majukumu yao kwa ufanisi.

"Niendelee kumshukuru Mheshimiwa Rais wa Jamhuri ya Muungano wa Tanzania Dkt Samia Suluhu Hassan kwa namna ambavyo anaendelea kuitendea haki sekta hii ya elimu hasa katika halmashauri yetu ya Wilaya ya Siha, sisi tuendelee kumsaidia kwa kutimiza wajibu wetu" amesema Mkurugenzi Mtendaji wa Halmashauri ya Wilaya Siha Haji Mnasi, PhD.

Akizungumzia ufaulu wa wanafunzi wa kidato cha nne mwaka 2023, Mkurugenzi Mtendaji wa Halmashauri ya Wilaya ya Siha Haji Mnasi, PhD ameipongeza Divisheni ya Elimu Sekondari na Wakuu wa Shule kwa jitihada zilizofanyika kwa mwaka 2023 zilizosaidia kupandisha ufaulu kutoka asilimia 88 kwa mwaka 2022 hadi asilimia 92 mwaka 2023 hali inayoashiria kuwa uwezo wa kufikia asilimia 100 iwapo nguvu na mikakati zaidi itaongezwa.

“Kwanza niwapongeze kwa matokeo ya mitihani ya kidato cha nne mwaka 2023, kumekuwa na mjongeo chanya wa matokeo kutoka asilimia 88 mwaka 2022 hadi 92 kwa mwaka 2023, hii ni ishara ya wazi kwamba tunaweza kufikia asilimia 100 iwapo nguvu na jitihada zaidi zitaongezwa kwa kuweka mikakati bora ya ufundishaji” amesema Mnasi.

 “Matokeo haya mazuri ya kidato cha nne yametokana na jitihada na vikao mkakati mlivyofanya na kutekeleza yale mnayokubaliana katika kuhakikisha Mnaboresha elimu na kupandisha ufaulu katika Shule zetu za sekondari” ameongeza Mkurugenzi Mtendaji Mnasi.

Amewaagiza Wakuu wa Shule kujielekeza kutafakari na kujadili ufundishaji unamlenga mwanafunzi mmoja mmoja, ujenzi wa umahirikupitia wanafunzi kupatiwa nyenzo muhimu za kufikiri, kutenda na kupenda masomo, shule kuwa na mazingira salama, tulivu na yanayohamasisha wanafunzi kujifunza na ufuatiliaji wa karibu wa ufundishaji na ujifunzaji.