DC Siha atoa onyo kali wanaoharibu mazingira

Posted on: August 25th, 2017

Mkuu wa Wilaya ya Siha na Mwenyekiti wa kamati ya ulinzi na Usalama mhe Onesmo Buswelu ametoa onyo kali kwa watu wote wanaojihusisha na uharibifu wa mazingira wilayani Siha.

Mkuu wa Wilaya ameyasema hayo mwishoni mwa wiki inayoishia tarehe 27 mwezi Agosti alipokuwa ameshiriki katika ibada ya mazishi ya moja ya mwananchi na mkazi wa Wilaya ya Siha yaliyofanyika katika kijiji cha Koboko Kusini kata ya Nasai, Tarafa ya Siha Kaskazini Wilayani hapa.

Amesema kuwa wapo baadhi ya watu katika maeneo mbalimbali wilayani Siha wanajihusisha na uharibifu wa mazingira kwa kukata miti ovyo bila hata kufuata utaratibu.

Mhe Buswelu amesema kuanzia sasa watu wote wanaoendelea na tabia hiyo waache mara moja kwani mkono wa sheria utawakuta muda sio mrefu ,hata hivyo amewataka viongozi wa vijiji ,Kata na vitongoji vyote Wilayani Siha kutoa ushirikiano wa kutosha ili kukabiliana na wahalifu hao.

Alieleza kuwa ili Wilaya iendelee kupata maji ya kutosha pamoja na kuwa na hali ya hewa ya kuvutia ni wajibu wa kila mmoja wetu kuhakikisha kuwa anatunza mazingira kwa kuotesha miti na kuitunza katika makazi na kuzunguka maeneo ya mashamba .

Wilaya ya Siha inakadiriwa kupanda miti zaidi ya milioni moja kila mwaka katika maeneo mbalimbali Wilayani hapa.