Zoezi la utoaji Dawa ya Minyoo na Kichocho lafanyika Siha

Posted on: April 29th, 2019

Halmashauri ya Wilaya ya Siha mkoa wa Kilimanjaro inafanya zoezi la utoaji dawa za minyoo na Kichocho kwa watoto wenye Umri wa miaka 5 hadi 14.

Akizungumzia kuhusu zoezi hilo, Mkurugenzi Mtendaji wa Halmashauri ya Siha ndugu Valerian Juwal alieleza kuwa utoaji wa dawa za minyoo na kichocho unafanyika leo tar 29.4.2019 na kesho tar 30.4.2019 katika shule zote 60 za msingi Wilaya ya Siha. 

Kwa ujumla maandalizi yote yamekamilika kwa ajili ya kufanikisha utoaji wa dawa kwa walengwa, ambapo halmashauri ya Siha inategemea kutoa dawa kwa watoto 23715 wenye umri wa miaka 5 hadi 14 alisema Juwal.

Juwal, alieleza kuwa dawa zote zinatolewa bure kwa watoto na hakuna malipo yoyote yanatozwa kwa kuwa dawa zimetolewa na Serikali ya Tanzania.

Napenda kutoa wito kwa Wazazi/Walezi wote kutoa ushirikiano wa kutosha ili kufanikisha zoezi hili muhimu kwa maendeleo ya wananchi wa Siha na Taifa kwa ujumla,alieleza Juwal. 

Pamoja na kutoa wito, Pia napenda kutoa maagizo kwa Watendaji wa Vijiji na Kata zote katika halmashauri ya Siha kuhakikisha wanasimamia na kufuatilia kwa karibu utekelezaji wa zoezi hili. 

Aidha, mwaka 2018 Halmashauri ya Siha ilifanikiwa utoaji wa dawa za minyoo na kichocho kwa watoto wenye umri wa miaka 5 hadi 14 kwa zaidi ya asilimia 98.5

Wanafunzi wa darasa la awali katika shule ya msingi Gararagua hapo juu wakipatiwa dawa ya minyoo na kichocho shuleni hapo leo tarehe 29.04.2019