ZINGATIENI SHERIA, KANUNI, MAELEKEZO YA TUME HURU YA TAIFA YA UCHAGUZI – MARCO MASUE

Posted on: August 4th, 2025

Msimamizi wa Uchaguzi jimbo la siha marco masue amesihi wasimamizi wasaidizi wa Uchaguzi ngazi ya kata kuzinagtia sheria, miongozo, taratibu na maelekezo yatakayotolewa na tume huru ya Uchaguzi ili kuhakikisha Uchaguzi unakuwa huru na haki.

Msimamizi wa Uchaguzi masue ametoa rai hiyo leo Agosti 04, 2025 wakati wa ufunguzi wa mafunzo kwa wasimamizi ngazi ya kata yaliyofanyika katika ukumbi wa Maina uliopo kata ya Nasai ambapo amewataka kujiepusha kuwa chanzo cha malalamiko na manung’uniko kutoka vyama vya siasa na wadau wa Uchaguzi.

Amewasisitiza kusoma katiba, sheria, kanuni, miongozo na maelekezo  mbalimbali yanayotolewa na tume ya huru ya Uchaguzi na kuvishirikisha vyama vyote  vya siasa vyenye usajili kamili katika hatua zote kwa kuzingatia matakwa ya katiba, sheria na maelekezo yanayotolewas na tume.

“Uchaguzi ni mchakato unazingatia hatua na taratibu mbalimbali za kikatiba na kisheria na zinapaswa kufuatwa, na ndiyo msingi wa Uchaguzi kuwa mzuri na wenye ufanisi, hivyo kupunguza au kumaliza kabisa malalamiko wakati wote wa Uchaguzi, kwa hiyo tume inategemea mtafanikisha zoezi hili muhimu kwa ufanisi” amesema Msimamizi wa Uchaguzi Jimbo la Siha Marco Masue.

“Msiache kusoma katiba, sheria, kanuni, taratibu, miongozo na fuateni maelekezo mbalimbali yatakayotolewa na tume huru ya Uchaguzi ili kujiimarisha na kutekeleza kwa ufanisi majukumu yenu ambayo tume ya Uchaguzi imewapa” ameongeza Msimamizi wa Uchaguzi Masue.

Mafunzo kwa wasimamizi wasaidizi wa Uchaguzi ngazi ya kata yatafanyika kuanzia leo tarehe 04 Agosti hadi tarehe 06 Agosti, 2025 kwa ili kuwajengea uwezo wa kutekeleza majukumu  na kufahamu mambo muhimu ya kuzingatia wakati wote wa Uchaguzi.