WIZARA YA FEDHA YATOA ELIMU YA FEDHA KWA WATUMISHI SIHA

Posted on: February 17th, 2025

Wizara ya fedha na mipango kupitia idara ya uendelezaji wa sekta ya fedha imetoa elimu ya fedha kwa watumishi wa umma Wilaya ya siha.

Elimu hiyo ya Fedha imetolewa leo Februari 17, 2025 katika ukumbi wa makao makuu ya Halmashauri kwa lengo la kuwajengea uelewa wa matumizi na kujiwekea akiba watumishi wa umma.

Akizungumza wakati wa ufunguzi wa zoezi la utoaji wa elimu Afisa Mkuu Mwandamizi kutoka Wizara ya Fedha, Idara ya Uendelezaji wa Sekta ya Fedha Bw. Salim Kimaro amewasihi watumishi wa umma kutumia elimu kuboresha matumizi yao ya kila siku na kuweka akiba ili kuepuka kuchukua mikopo maarufu kausha damu.

Elimu hii itawawezesha kufahamu ni wakati gani unatakiwa kuchukua mkopo na namna bora ya kuutumia, pia inatuwezesha kufahamu mahali salama kwa kuwekeza fedha zetu kidogo kidogo ili kuboresha hali zetu kiuchumi na kuwaondolea mawazo ya kukopa kila saa“ amesema Bw. Salim KImaro.

Kwa Upande wake, Afisa Mwandamizi Masoko na Mawasiliano kutoka Kampuni ya uwekezaji ya UTT – AMIS Rahim Mwanga amewahimiza watumishi wa umma Wilaya ya Siha kujijengea mazoea ya kuweka akiba kila wanapopata fedha ili isaidie kuongeza uwekezaji, mipango ya maendeleo na kukuza uchumi.

Amesema ili kuweka akiba ya fedha ni lazima kwanza watumishi wabainishe matumishi ya yasiyo ya lazima na kuyaondoa na akiba iwe sehemu ya matumizi ya lazima kila wanapopata fedha.

“Na ukifanikiwa kujenga utamaduni wa kuweka akiba, suala la kuwekeza fedha yako linakuja, na unaweza kuwekeza kwenye kilimo, biashara na masoko ya mitaji ikiwemo hisa, hati fungani na kununua bond ili kuiwezesha akiba yako unayoitunza kukua na kuongezeka” amesema Rahim Mwanga.

Elimu ya Fedha kwa wananchi wote ni mpango wa Serikali kupitia Wizara ya Fedha unaolenga  kuwawezesha na kuwaelimisha kuhusu masuala ya fedha, mikopo, uwekezaji ili watumie huduma sahihi za fedha.