Waziri wa Afya afanya ziara Wilaya ya Siha

Posted on: October 5th, 2024

Taarifa ya Ziara ya Waziri wa Afya, Mhe. Jenista Mhagama - Wilaya ya Siha, Mkoa wa Kilimanjaro

Tarehe 5 Oktoba 2024, Waziri wa Afya, Mhe. Jenista Mhagama, alifanya ziara katika Wilaya ya Siha, Mkoa wa Kilimanjaro, akilenga kuboresha huduma za afya katika Zahanati ya Mawasiliano na Hospitali ya Magonjwa Ambukizi Kibong'oto. Ziara hii ilihusisha tathmini ya huduma zinazotolewa na kuangazia changamoto zinazokabili zahanati na hospitali hizo.

Katika Zahanati ya Mawasiliano iliyopo kijiji cha Mawasiliano  Kata ya Gararagua, Waziri Mhagama alikagua miundombinu na huduma zinazotarajiwa kutolewa mara baada ya kufunguliwa.

 Alisisitiza umuhimu wa kuboresha upatikanaji wa dawa na vifaa tiba ili kuhakikisha jamii inapata huduma bora za afya. Alitoa maelekezo ya kuimarisha ushirikiano kati ya zahanati na hospitali kubwa za rufaa ili kuboresha mnyororo wa huduma za afya.

Akiwa katika Zahanati ya Mawasiliano mhe.Mhagama alifanya Harambee ndogo iliyowezesha kupatikana kwa Fedha za kujenga kibanda cha kukaa wagonjwa wakati wasubiri kupata huduma mbalimbali katika Zahanati hiyo.

Akiwa Mawasiliano Mhe.Mhagana aliweka jiwe la Msingi la Zahanati ya Mawasiliano na kupongeza uongozi wa Wilaya ya Siha pamoja na Halmashauri ya Siha kwa usimamizi bora wa  ujenzi wa Zahanati hiyo.

Waziri Mhagama alitembelea Hospitali ya Magonjwa Ambukizi Kibong'oto, ambapo alikagua idara mbalimbali na kuzungumza na wafanyakazi wa afya. Alisisitiza umuhimu wa kuimarisha elimu ya afya kwa jamii kuhusu magonjwa ambukizi, pamoja na kuwataka wahudumu wa afya kuendelea na mafunzo ya kitaaluma ili kuboresha huduma.

Waziri Mhagama pia alizungumza kuhusu changamoto zinazowakabili waganga wa TB kutoka migodi ya Mererani, Mkoa wa Manyara. Aliweka wazi mpango wa Serikali wa kuwasaidia waganga hao kwa kutoa elimu na vifaa vya kupimia na kutibu TB. Alitaja umuhimu wa kushirikiana na wadau wa maendeleo ili kufanikisha kampeni za uhamasishaji kuhusu kinga na matibabu ya TB, pamoja na kuanzisha vituo vya afya karibu na maeneo ya kazi.

Ziara hii ililenga kuimarisha huduma za afya na kuhakikisha wananchi wanapata huduma bora, huku akihimiza umuhimu wa ushirikiano katika kufanikisha malengo ya afya katika jamii. Mhe. Mhagama aliahidi kufuatilia maendeleo ya mipango iliyowekwa ili kuhakikisha utekelezaji wa ahadi hizo.

Katika ziara ya Waziri wa Afya, Mhe. Jenista Mhagama, alibainisha kuwa Serikali inatumia rasilimali kubwa katika kuwahudumia wagonjwa wa TB. Kila mwaka, Serikali inatumia takriban shilingi bilioni 10 kwa ajili ya matibabu, uchunguzi, na usaidizi wa kifaa kwa wagonjwa wa TB. Hii ni pamoja na gharama za dawa, vifaa vya uhamasishaji, na elimu kwa umma.

Kuhusu umri unaoathirika zaidi na ugonjwa huu, kundi lililo katika hatari kubwa ni watu wenye umri kati ya miaka 15 hadi 49. Hata hivyo, watoto na wazee pia wako katika hatari ya kupata TB, hasa katika maeneo yenye maambukizi makubwa. Mhe. Mhagama alisisitiza umuhimu wa kutoa elimu kwa makundi haya ili kupunguza maambukizi na kuhakikisha matibabu yanapatikana kwa wakati.

Aliahidi kuwa Serikali itapanua mikakati ya kupunguza mzigo wa TB nchini, ikishirikiana na wadau wa ndani na nje ya Nchi.