WAZIRI BASHUGWA AZINDUA KITUO KIPYA CHA POLISI WANANCHI SIHA

Posted on: August 6th, 2025

Waziri wa mambo ya ndani ya nchi Mhe. Innocent Bashungwa amewashukuru wananchi wa Wilaya ya Siha na wadau wa maendeleo  kwa kushiriki kikamilifu katika ujenzi wa kituo kipya cha polisi Siha cha daraja B kwa kuchangia shilingi milioni 179.4.

Waziri Bashungwa ametoa shukrani hizo leo Agosti 06, 2025 wakati wa uzinduzi wa kituo cha kipya cha polisi Siha cha daraja B kilichojengwa kwa ushirikiano wa wananchi wa wilaya ya Siha na Serikali kwa jumla ya shilingi Milioni 522.5.

Amesema ushirikiano huo kati ya wananchi na jeshi la polisi ni kielelezo cha utekelezaji wa dhana ya polisi jamii na jambo ambalo serikali inajivunia.

“Uzinduzi huu wa kituo cha polisi ni jitihada za serikali ya awamu ya sita, inayoongozwa na Mhe. Dkt Samia Suluhu Hassan katika kuboresha miundombinu ya majengo na vitendea kazi ili kutoa huduma bora ya usalama kwa watanzania wote” amesema Waziri Bashungwa.

Naye, Mkuu wa Jeshi la Polisi nchini IGP. Camillus Wambura amesema Serikali imekamilisha na inaendelea kujenga miradi mbalimbali ya majengo  na ofisi za polisi nchi nzima ambapo jumla ya miradi ya ujenzi wa majengo ya jeshi la polisi 164 ikiwa ni majengo mapya na majengo yaliyofanyiwa ukarabati mkubwa kama ilivyo Wilaya ya Siha.

Amesema miradi ya ujenzi na ukarabati wamajengo uliokamilika ina thamani ya shilingi Bilioni 32.44 huku miradi inayoendelea kutekelezwa nchi nzima ina thamani ya shilingi Bilioni 42.65.

“Kwa hiyo ya fedha zilizopokelewa na jeshi la polisi kwa ajili ya ujenzi wa miradi mpaka sasa ni shilingi Bilioni 75.98” ameongeza IGP Wambura.

Kwa upande wake, Mkuu wa Mkoa wa Kilimanjaro Mhe. Nurdin Babu amesema kujengwa kwa vituo vipya vya polisi Mkoa wa Kilimanjaro ni kuimarisha usalama wa watu na mali zao.