Wanaochangia utoro wa wanafunzi Mashuleni waonywa:DC Siha

Posted on: April 10th, 2019

Mkuu wa Wilaya ya Siha Mhe. Onesmo Buswelu amewataka wazazi na walezi katika Wilaya ya Siha kuwapatia elimu watoto wakike na wale wa kiume bila kuwabagua kwa misingi ya jinsia zao.

Hayo ameyasema akiwa katika shule ya Sekondari Matadi iliyopo Kata ya Ndumet Tarafa ya Siha Magharibi aliposhiriki na wananchi katika ujenzi wa madarasa mawili unaoendelea shuleni hapo. Ndugu zangu wananchi wa Ndumet leo nimefika hapa kushirikiana nanyi katika shughuli za maendeleo hasa ujenzi wa madarasa mawili unaoendelea shuleni hapa alisema Buswelu.

Aliwaeleza wananchi kuwa Serikali ya Tanzania inayoongozwa na Mhe. Rais Magufuli imewaletea shilingi milioni 25 katika shule ya sekondari Matadi kwa ajili ya kukamilisha ujenzi wa vyumba viwili vya Madarasa vilivyoanzishwa kwa nguvu za wananchi wa Kata ya Ndumet.

Hata hivyo Mhe. Buswelu akiwa shuleni hapo alitoa agizo kwa viongozi wote kuanzia ngazi ya Kata,Vijiji hadi vitongoji kusimamia kwa karibu mahudhurio ya wanafunzi mashuleni na pale itapoonekana watoto wa shule wanajishuhulisha na kazi za mashambani muda na wakati wa siku za shule basi wazazi /walezi husika wachukuliwe hatua kali za kisheria.

Ndugu zangu kwa hili la utoro mashuleni nitachukua hatua mara moja kwa wale wote watakaohusika kwani watu hao ni maadui wakubwa wa maendeleo ya Wilaya ya Siha na Taifa kwa ujumla alisema Mhe. Buswelu.

Naye Diwani wa Kata ya Ndumet Mhe. Jackson Rabo alisema kuwa Wananchi wa Kata ya Ndumet wamefurahi sana kwa Serikali kutoa kiasi cha milioni 25 kwa ajili ya kukamilisha ujenzi huo, Kwa niaba yangu binafsi na kwa niaba ya Viongozi wa Kata na Vijiji tunapenda kuishukuru Serikali ya Jamhuri ya Muungano wa Tanzania na Mhe. Rais wetu mpendwa Magufuli kwa jinsi anavyotujali wananchi wanyonge kama sisi alisema Rabo.

Halmashauri ya Wilaya ya Siha Mkoa wa Kilimanjaro katika kipindi cha mwaka 2019 imepokea jumla ya shilingi milioni 200 kutoka Serikali ya Jamhuri ya Muungano wa Tanzania kwa ajili ya kukamilisha ujenzi wa miradi viporo wa madarasa (maboma) katika shule mbalimbali ya Sekondari za Serikali Wilayani Siha.

Mkuu wa Wilaya ya Siha Mhe. Onesmo Buswelu (katikati) akishiriki katika kazi ya ujenzi katika shule ya sekondari Matadi

Mkuu wa Wilaya ya Siha Mhe. Onesmo Buswelu(aliyebeba ndoo ya maji) akionesha mfano wa viongozi kushirikiana na wananchi katika kazi za maendeleo,

Wananchi  na mafundi mbalimbali wakishiriki katika kazi ya ujenzi wa vyumba vya madarasa Katika shule ya sekondari Matadi Kata ya Ndumet

Wanafunzi wa kidato cha tatu katika shule ya Sekondari Matadi wakiwa darasani kwa ajili ya kuhudhuria vipindi vya kila siku shuleni hapo