WAZABUNI WA CHAKULA MASHULENI WASHAURIWA KUSAMBAZA MAHARAGE LISHE YANAYOZALISHWA SIHA

Posted on: March 21st, 2024

Wenyeviti wa Kamati za Vyakula Mashuleni kwa kushirikiana na Maafisa Kilimo na Wakuu wa Shule na Walimu Wakuu wameombwa kuimarisha lishe kwa kuendelea kusimamia uzalishaji wa maharage lishe kwa ajili ya afya bora ya jamii hasa kwa watoto mashuleni.

Akizungumza kwa niaba ya Mkurugenzi Mtendaji Halmashauri ya Wilaya ya Siha wakati wa ufunguzi wa kikao cha wadau wa maharage lishe Wilaya ya Siha kilichofanyika katika ukumbi wa mikutano wa makao makuu ya Halmashauri leo Machi 21, 2024,  Mkuu wa Divisheni ya Kilimo, Mifugo na Uvuvi Dkt Barnabas Mbwambo amesema usimamizi wa uzalishaji wa maharage lishe mashuleni na katika jamii utasaidia kufikia lengo la serikali ya awamu ya sita ya kuwa na jamii yenye afya bora na lishe nzuri.

Amesema baada ya Walimu Wakuu na Wakuu wa Shule zinazolima maharage lishe na jamii kwa ujumla kugawiwa mbegu za maharage lishe na Taasisi isiyokuwa ya Serikali ya Global Alliance for Improved Nutrition (Gain) uzalishaji wake umeongezeka katika wilaya ya siha.

“Natumaini kuwa walimu wote mtaendelea kulima na kununua vyakula vya lishe mashuleni ili kusonga mbele katika kupiga vita utapiamlo kwa watoto wetu wadogo na barehe” amesema Dkt Mbwambo, Kaimu Mkurugenzi Mtendaji.

“Naomba mfumo huu uwe endelevu ili watoto wetu waendelee kula vyakula vyenye virutubishi na kwa kuwa maharage lishe sasa yanapatikana Wilayani Siha, niwahimize wazabuni wetu kupeleka maharage lishe mashuleni” ameongeza Dkt Mbwambo.

Kikao hicho cha wadau wa lishe kimeandaliwa na Serikali kwa kushirikiana na Taasisi isiyokuwa ya Serikali ya Global Alliance for Improved Nutrition (Gain) kwa lengo la kupata taarifa ya uzalishaji wa maharage lishe katika shule za msingi na sekondari na jamii, kuweka mkakati wa kuongeza uzalishaji wa maharage lishe na kuwaunganisha wakulima wa maharage lishe na wafanyabiashara pamoja na wazabuni.