Watumishi wa Umma watakiwa kuzingatia maadili:DC Siha

Posted on: July 26th, 2018

Watumishi wa Umma watakiwa kuzingatia maadili: DC Siha

Watumishi wa Umma katika Halmashauri ya Wilaya ya Siha watakiwa kuzingatia maadili ya utumishi wa umma wakati wote wanapokuwa katika ofisi za Serikali.

Hayo yamesemwa na mkuu wa Wilaya ya Siha mhe. Onesmo Buswelu  katika kikao cha maandazi ya kupokea mwenge wa uhuru Wilaya ya Siha mwaka 2018 kilichofanyika 25 Julai,2018 katika ukumbi wa mikutano wa Halmashauri ya Wilaya ya Siha.

Kabla ya kufunga kikao hicho Mkuu wa Wilaya ya Siha mhe. Onesmo Buswelu aliwataka watumishi wa umma kuzingatia maadili katika utendaji wa kazi za umma hasa nidhamu kazini.

“Napenda kuwakumbusha watumishi wa umma katika Wilaya ya Siha kuhakikisha kuwa mnazingatia maadili ya kazi zenu muwapo katika ofisi za Umma hasa suala la kuvaa  mavazi  ya heshima ” ,alisema Mkuu wa Wilaya.

Alisema kuwa watumishi wa umma wanatakiwa kutambua kuwa jamii ya watanzania inawategemea wao kama wasomi na watu wenye utaalamu wa mambo mbalimbali yanayoweza kusaidia  kupatikana kwa maendeleo ya haraka kwa ustawi katika jamii.

“Mimi mkuu wa Wilaya ya Siha siwezi kufumbia macho na kuacha kukemea baadhi ya watumishi wa umma  katika  Wilaya yetu kukiuka maadili ya kazi ikiwemo kuvaa mavazi yasiyo ya heshima pamoja na kutoa lugha mbaya kwa wananchi  katika ofisi za umma”,alisema Buswelu.

“Natoa agizo kwa Mkurugenzi Mtendaji wa halmashauri ya Wilaya ya Siha kufuatilia jambo hili  kwa karibu na ikiwezekana kuwachukulia hatua za kinidhamu wale  watumishi wachache wanaokwenda kinyume na miongozo na kanuni za serikali” alisema Buswelu.

Aidha katika kikao hicho,mkuu wa Wilaya ya Siha aliwapongeza watumishi,wananchi wa Siha kwa maandalizi mazuri ya kupokea mwenge wa uhuru wilayani Siha mwaka 2018.

“Kipekee nimeridhika na maandalizi yanayoendelea ya kupokea mwenge wa uhuru,naomba ushirikiano huu uendelee katika shughuli zote za maendeleo na zile za kijamii kwa maendeleo ya Wilaya yetu”  alisema Buswelu.

Wilaya ya Siha inatarajia kupokea mwenge wa uhuru tarehe 29/09/2018 ukitokea Wilaya ya Hai na tarehe 30/09/2018 asubuhi, mwenge  wa uhuru utakabidhiwa Wilaya ya Rombo.