Wanufaika wa TASAF watakiwa kuungana-Waziri Mkuchika

Posted on: August 29th, 2018

Wanufaika wa TASAF watakiwa kuungana-Waziri Mkuchika

Watu wanaonufaika na mpango wa kunusuru kaya maskini Wilayani Siha wametakiwa kuunda vikundi vya ujasiriamali kwa lengo la kujiendeleza kiuchumi na kujengeana uzoefu.

Kauli hiyo imetolewa na Waziri wa Nchi,ofisi ya Rais,menejimenti ya Utumishi wa Umma na Utawala bora Kapt. (Mst) Mhe. George Mkuchika alipofanya ziara ya siku moja  Wilayani Siha mapema wiki hii na kutembelea kaya zinazonufaika na mpango huo.

Akiwa katika kijiji cha Ngumbaro Kata ya Songu Mhe. George Mkuchika alitembelea kaya ya Halima Mganga na Joyce Kileo na baadaye alikutana na uwakilishi wa kaya zinazonufaika na mpango wa TASAF katika Halmashauri ya Wilaya ya  Siha.

Akiongea na wanufaika wa TASAF Wilayani Siha mhe. George Mkuchika Waziri wa Nchi,Ofisi ya Rais utumishi na utawala bora aliwataka wanufaika wa Tasaf  Wilaya ya Siha kuunda kikundi chao cha  vikoba  kwa lengo la kutunisha mfuko wa kuweka na kukopa.

Alieleza kuwa kwa kufanya hivyo watajiwezesha kiuchumi na kujikomboa na umaskini wa kipato na kufanikisha lengo la mpango wa serikali wa kuhakikisha kuwa jamii ya watanzania inajikomboa na umaskini wa kipato.

Akiwa Wilayani Siha mhe Waziri aliridhishwa na usimamizi wa shughuli za TASAF unaofanywa na Halmashauri ya Wilaya ya Siha kwa niaba ya Serikali ya Jamhuri ya Muungano wa Tanzania.

Halmashauri ya Wilaya ya Siha inajumla ya Kaya 1846 zinazonufaika na mpango wa TASAF wa kunusuru kaya maskini ambapo kaya  nyingi kati ya hizo zimeonyesha mafanikio makubwa  hasa katika maendeleo ya kiuchumi na kuongezeka kwa kipato.