Wanaouza pembejeo "feki" kwa wakulima kukiona-DC Siha

Posted on: February 26th, 2018

Wanaouza pembejeo “feki” sasa kukiona-DC Siha

Mkuu wa Wilaya ya Siha Mh. Onesmo Buswelu ametoa onyo kali kwa wafanyabiashara na mawakala wa pembejeo za kilimo Wilayani Siha kuacha mara moja tabia ya kuuza pembejeo za kilimo na mifugo ambazo hazifai katika matumizi.

Hayo ameyasema katika kikao cha Kamati ya ushauri ya Wilaya ya Siha(DCC) kilichokutana leo tarehe 26.2.2018 katika ukumbi wa mikutano wa Halmashauri ya Wilaya ya Siha. kikao hicho kimefanyika kwa ajili ya ya kupitia na kuchambua makadirio ya bajeti ya Halmashauri ya Wilaya ya Siha kwa mwaka wa fedha 2018/2019.

Katika kikao hicho Mkuu wa Wilaya ya Siha ambaye pia ni mwenyekiti wa Kamati ya ushauri Wilaya ya Siha, alieleza kuwa amepokea malalamiko kutoka kwa wananchi kuhusu kuwepo kwa wafanyabiashara wa pembejeo kuuza madawa feki ambayo hayafanyi kazi au yamepitwa na wakati.

“Nimemuagiza Mkuurugenzi mtendaji wa Halmashauri ya Wilaya ya Siha kupitia wataalam wake kufanya ukaguzi wa kushtukiza katika maduka yote yanayouza pembejeo za kilimo na mifugo ili kubaini ubora wa pembejeo hizo na wale wote watakaokutwa na bidhaa feki wachukuliwe hatua za kisheria” alisema Buswelu.

Vilevile mwenyekiti huyo wa Kamati ya Ushauri ya Wilaya (DCC) alitoa wito kwa wananchi na wakazi wa Wilaya ya Siha kutoa taarifa kwa vyombo vya ulinzi na usalama pamoja na viongozi wengine pale wanapokuwa na mashaka na pembejeo walizouziwa. “Tunaomba wananchi tushirikiane kwa pamoja ili kumaliza tatizo hili ambalo limeanza siku za hivi karibuni katika Wilaya yetu ya Siha” alisema Buswelu.

Kikao cha Kamati ya Ushauri Wilaya ya Siha kilihudhuriwa na Waheshimiwa Madiwani wa Halmashauri ya Siha,viongozi wa Dini,viongozi wa vyama vya siasa, wadau mbalimbali wa maendeleo,wawakilishi wa mashirika ya Kiserikali nay ale yasiyo ya Kiserikali pamoja na wataalam wa Halmashauri ya Wilaya ya Siha.