Wananchi watakiwa kupinga ukatili wa Kijinsia:DC Siha

Posted on: September 8th, 2022

Mkuu wa Wilaya ya Siha mhe. Thomas Apson ametoa wito kwa jamii ya wananchi na wakazi wa Wilaya ya Siha mkoa wa Kilimanjaro kuweka mikakati ya pamoja ya kupinga ukatili dhidi ya wanawake na watoto unaoendelea kwa miaka mingi sasa.

kauli hiyo ameitoa  leo 8 Septemba,2022 katika ukumbi wa mikutano wa Halmashauri ya Wilaya ya Siha alipokuwa katika uzinduzi wa mpango wa mwaka mmoja wa shirika lisilo la Kiserikali NAFGEM walioanzisha mpango wa kuelimisha jamii jinsi ya kupinga na kuachana na mila potofu za ukatili dhidi ya watoto na wanawake hususani kuepukana na ukeketaji wa Wanawake.

"Napenda kuwaomba wananchi kuwa zipo mila ambazo zimepitwa na wakati ambazo kwa dunia ya leo tunatakiwa kuziacha kwani zinaleta madhara makubwa kwa jamii yetu ikiwemo suala la unyanyasaji wa kijinsia hususani wanawake na watoto" alisema Thomas Apson Mkuu wa Wilaya ya Siha

Akitoa taarifa ya mradi huo kwa kamati ya lishe Wilaya ya Siha ,mwakilishi wa shirika la NAFGEM ndugu Magdalena Lameck alisema kuwa shirika lisilo la Kiserikali NAFGEM limeweka malengo mahususi ya kuifikia jamii ya wananchi wa Wilaya ya Siha katika awamu tofautitofauti na kwa kuanzia mradi utaanza katika kata ya Karansi na utadumu kwa muda wa mwaka mmoja kuanzia mwezi Septemba,2022.

Ameeleza kuwa lengo la mradi huo ni kuelimisha jamii juu ya lishe bora na mapambano dhidi ya ukatili wa kijinsia kwa wanawake na watoto hususani jamii kuachana na suala la ukeketaji kwa wanawake.

Pia aliwashukuru Viongozi wa Wilaya ya Siha kwa ushirikiano mkubwa wanaoendelea kutoa kwa shirika la NAFGEM katika mipango mbalimbali ya kuimarisha mtandao wa kuelimisha jamii juu ya madhara ya ukeketaji kwa wanawake na ameomba ushirikiano huo kuendelea zaidi ili kufikia malengo ya Serikali na jamii kwa ujumla.

"Napenda kuwahakikishia Kamati ya lishe na wananchi wa Siha kuwa NAFGEM itaendelea kuweka mpango wa kuzifikia kata nyingine 16  za Wilaya ya Siha zilizobaki bila kufikiwa katika mpango huu muhimu na  hii itategemea sana na upatikanaji wa bajeti kutoka shirika letu" alisema Magdalena.

Mwisho baada ya uzinduzi Mkuu wa Wilaya ya Siha mhe. Thomas Apson ambaye alikuwa mgeni rasmi katika uzinduzi wa mradi wa Lishe na Mapambano dhidi ya ukatili wa Kijinsia ametoa wito kwa mashirika mengine yasiyo ya Kiserikali kuiga mfano mzuri wa NAFGEM wa kuunga mkono juhudi za Serikali za kuimarisha lishe bora kwa jamii na mapambano dhidi ya ukatili dhidi ya wanawake na watoto.