Wananchi Watakiwa kuendelea kujikinga na uviko 19

Posted on: September 21st, 2021

Wananchi wa Wilaya ya Siha mkoa wa Kilimanjaro wametakiwa kuendelea kuchukua tahadhari ya kujikinga na uviko 19 kwani hali ya ugonjwa wa corona bado ni tishio katika maeneo mengi ya Dunia

Kauli hiyo imetolewa  tarehe septemba 21,2021 na viongozi wa madhehebu ya dini katika Wilaya ya Siha walipokuwa katika kikao maalum kilichoitishwa na Mkuu wa Wilaya ya Siha kwa lengo la kujadili janga la ugonjwa wa corona kwa Wananchi

Kikao hicho maalumu kilijumuisha viongozi wote wa Madhehebu ya dini,Watendaji wa Kata,wakuu wa idara na vitengo katika Halmashauri ya Siha pamoja na wataalam wa afya ambapo wote kwa pamoja wamejadili na kuweka malengo ya kuendelea na kutoa elimu kwa wananchi juu ya kujikinga na uviko 19

awali akitoa mada katika kikao hicho,Mganga mkuu wa Wilaya ya Siha Dkt. Peter Mahuu ameeleza kuwa katika Wilaya ya Siha watu 101 walihisiwa kupata dalili za ugonjwa wa corona ambapo  miongoni mwao watu 18 walifariki dunia kutokana na dalili za ugonjwa huu.

ameeleza kuwa wananchi wanatakiwa kuchukua tahadhari ya kujikinga na corona ikiwa ni pamoja na kunawa mikono na maji tiririka,kuvaa barakoa pamoja na kuepuka misongamano isiyo ya lazima.

aidha,alitoa ushauri kwa wananchi na wakazi wa Wilaya ya Siha kupata chanjo iliyotolewa na Serikali kwani chanjo hiyo ni salama na inatolewa bure kwa wananchi wote wenye umri wa kuanzia miaka 18 na kuendelea