WANANCHI SIHA WAPONGEZWA KWA KUCHANGIA UNITI ZAIDI YA 100 ZA DAMU

Posted on: September 8th, 2024

Mkuu wa Wilaya ya Siha Mhe. Dkt Christopher Timbuka amewashukuru wananchi wa wilaya ya siha kwa kujitolea kuchangia damu salama kwa lengo la kuokoa maisha ya wagonjwa wenye uhitaji wa kuongezewa damu.

Akizungumza wakati wa kuhitimisha zoezi la uchangiaji damu lililoandaliwa na wanachama wa klabu ya yanga Tawi la Sanya Juu kwa kushirikiana na Serikali na Wadau mbalimbali wa maendeleo Wilaya ya Siha  leo Septemba 08, 2024 katika kata ya Sanya Juu, Mhe. Dkt Christopher Timbuka amesema  uniti 104 za damu zimechangiwa ikiwa ni ongezeko la asilimia zaidi ya 100 ikilinganishwa na uniti 52 zilizopatikana kwenye zoezi kama hilo mwaka jana.

Amesema upatikanaji wa uniti hizo 104 zitasaidia kuokoa maisha ya wagonjwa wanaohitaji kuongezewa damu hasa makundi maalumu ya akina mama wajawazito, watoto,  kundi la watu wenye magonjwa sugu kama kansa na kisukari na watu wanaopata ajali.

“ukisikia kwamba hospitalini kuna changamoto ya damu huwa tunapata wakati mgumu sana lakini tunashukuru sana wenzetu yanga kwa kuandaa jambo hili jema la uchangiaji damu kwa sababu dawa nyingine zinatengenezwa kiwandani lakini damu mpaka itoke kwa binadamu, na napongeza mwaka huu tumechangia zaidi ya mwaka jana” amesema Dkt Timbuka.

Naye, Mganga Mfawidhi wa Hospitali ya Wilaya ya Siha Dkt Nsubili Mwakapeje amesema inapofikia hatua mwanadamu anahitaji kuongezewa damu hakuna mbadala wa damu hivyo damu inapokuwepo hospitalini inasaidia kwa kiasi kikubwa kuokoa maisha yao.

“Tunawashukuru sana Tawi la Yanga Sanya Juu kwa kuratibu zoezi la uchangiaji damu kwa kushirikiana na Serikali ambayo imewezesha upatikanaji wa vifaa vya kuhifadhia damu na vinavyotumika wakati wa zoezi la uchangiaji wa damu” amesema Dkt Mwakapeje.