WANANCHI MOWONJAMU WAPONGEZWA KWA USHIRIKI MZURI KWENYE MIRADI

Posted on: February 5th, 2024

Kamati ya fedha, uongozi na mipango ya Halmashauri ya Wilaya ya Siha imewapongeza wananchi wa kijiji cha Mowonjamu Kata ya Livish kwa ushiriki mzuri kwenye shughuli za ujenzi wa miradi ya maendeleo.

Pongezi hizo zimetolewa leo Februari 05, 2024 na kamati ya fedha wakati wa ziara ya kukagua maendeleo ya ujenzi wa zahanati ya kijiji hicho kwa nguvu za wananchi mpaka hatua ya renta ambapo wananchi, wadau na mfuko wa jimbo wamechangia kiasi cha Shilingi Milioni 18.5 kwa lengo la kusogeza huduma za afya karibu na wananchi.

Kamati umeushauri uongozi wa kijiji kwa kushirikiana na viongozi wa kata na wananchi kusimamia kwa karibu fedha Shilingi Milioni 50 iliyoletwa na serikali kwa ajili ya kukamilisha zahanati hiyo na ianze kutoa huduma kwa wananchi kama ilivyokusudiwa.

“Mimi nikuombe Mtendaji wa Kata, Mwenyekiti, Viongozi wa Kijiji na Wananchi mshirikiane kwa karibu kwa kufanya ushindani wa wazi kwa wazabuni ili fedha iliyoletwa kwa ajili ya kukamilisha mradi huu itimize kazi iliyokusudiwa” amesema Makamu Mwenyekiti wa Halmashauri ya Wilaya ya Siha Mhe. Noel Mollel.

“Mimi niwapongeze wananchi wa kijiji cha Mowonjamu kwa kushiriki kikamilifu mpaka mmefikisha mradi huu hatua hii hali iliyosaidia serikali kupitia kwa Mbunge wa Jimbo la Siha na Naibu Waziri wa Afya Mhe Dkt Godwin Mollel kuleta Shilingi Milioni 50 kukamilisha kazi hii nzuri mlioianzisha kwa nguvu zenu” ameongeza Mhe Noel Mollel.

Kwa upande wao, Wananchi wa Kijiji cha Mowonjamu wamemshukuru Naibu Waziri wa Afya na Mbunge wa Jimbo la Siha kwa kubeba ombi la kijiji hicho la kujengewa zahanati na kulifikisha serikalini hali iliyosaidia kupatikana kwa fedha za kumalizia mradi huo ili uanze kutoa huduma kwa wananchi.