Wakulima Kata ya Mitimirefu wahimizwa kulima kwa Tija

Posted on: June 19th, 2024

Wakulima katika kijiji cha kalimaji kata ya Mitimirefu wamehimizwa kutumia elimu ya kilimo na mbegu bora zinazotolewa na Taasisi ya Utafiti wa Kilimo Tanzania – TARI kuboresha kilimo chao na kulima kwa tija.

Wito huo umetolewa leo juni 19, 2024 na Afisa Tarafa wa Siha mashariki Khadija Kichwa kwa niaba ya Mkuu wa Wilaya ya Siha Mhe. Dkt Christopher Timbuka katika maadhimisho ya siku ya mkulima shambani yaliyofanyika katika kijiji cha kalimaji kata ya Mitimirefu.

Amesema mbegu hizo zilizofanyiwa utafiti na Taasisi ya Utafiti wa Kilimo Tanzania – TARI zinauwezo wa kukabiliana na mabadiliko ya tabia ya nchi na zinatoa mazao mengi.

Amesema mbegu hizo zina madini mengi ya chuma na zinc, ambapo zikizalishwa kwa wingi katika kata ya mitimirefu utasaidia kuongeza uboreshaji wa lishe za watoto shuleni na wananchi kwa ujumla.

“Mkuu wa Wilaya Mhe Dkt Christopher Timbuka ameniagiza niwaambie angependa kuona tunalima kwa wingi kwa kutumia mbegu hizi zenye viambata lishe ili watoto na wananchi wote tupate chakula na kipato kitakachowezesha kujikuza kiuchumi” amesema Afisa Tarafa wa Siha mashariki Khadija Kichwa.

“Tunamshukuru Rais wetu kupitia wizara ya kilimo kwa kuwafikia wananchi wa Kalimaji, kushirikiana na wakulima kutoa elimu na mafunzo kupitia mashamba darasa ya maharagwe na choroko, sasa na sisi tukawe wa mfano kwa wakulima wengine” ameongeza Khadija.

Viongozi na wananchi wakiwa katika maadhimisho ya siku ya mkulima shambani yaliyofanyika katika kijiji cha kalimaji leo Juni 19, 2024.