WAJUMBE WA DCC WAHIMIZWA KUSHAURI NAMNA YA KUCHOCHEA MAENDELEO

Posted on: October 30th, 2023

Mkuu wa Wilaya ya Siha Mhe. Dkt Christopher Timbuka amewahimiza wajumbe wa Kikao cha Ushauri wa Maendeleo ya Wilaya ya Siha kuendelea kushauri namna bora ya kuchochea maendeleo ndani ya Wilaya ikiwemo Uwekezaji kwenye sekta ya Kilimo, Miundombinu (Barabara), Maji, Huduma za Wageni na Utunzaji wa Mazingira.

Mhe. Dkt Timbuka amesema hayo leo Oktoba 30, 2023 wakati akifungua kikao cha ushauri wa Maendeleo ya Wilaya ya Siha kilichofanyika kwenye ukumbi wa mikutano wa makao makuu ya Halmashauri ya Wilaya ya Siha huku akiwaahidi kuheshimu ushauri wa kila mmoja kwa maslahi mapana ya Maendeleo ya Wilaya.

Amesema Msingi wa Maendeleo ya Wilaya unajengwa kwa kiasi kikubwa na ushauri unaotolewa na wajumbe hao hivyo mwelekeo wa vikao vya baraza la ushauri wa Maendeleo utajikita zaidi kwenye kujadili namna bora ya kuchochea uwekezaji wenye tija kwa wananchi wa Wilaya ya Siha na Taifa kwa ujumla.

Kwa Upande wake, Mkurugenzi Mtendaji wa Halmashauri ya Wilaya ya Siha Haji M. Mnasi (PhD) amesema ushauri uliotolewa kuhusu ukusanyaji wa mapato ya ndani ikiwa ni pamoja na kuanzisha miradi ya kimkakati itakayochagiza kuongeza ukusanyaji wa mapato utafanyiwa kazi.

Amesema Maendeleo hayana vyama wala rangi hivyo wajibu wao kama viongozi ni kupokea ushauri unaotolewa na wajumbe bila kujali itikadi zao za vyama, dini au kabila na kuufanyia kazi.

Wajumbe wa Kikao cha ushauri wa Maendeleo ya Wilaya ya Siha wamepokea na kujadili taarifa mbalimbali ikiwemo taarifa ya Halmashauri ya Wilaya ya Siha,  Shirika la Umeme Tanzania (TANESCO), Kampuni ya Ranchi za Taifa (NARCO), Wakala wa Barabara Mjini na Vijijini (TARURA), Taasisi ya Utafiti wa Mifugo Tanzania (TALIRI) kituo cha West Kilimanjaro, Wakala wa Maji na Usafi wa Mazingira Vijijini (RUWASA) Wilaya ya Siha na Mamlaka ya Mapato Tanzania (TRA) Wilaya ya Siha.