Wahanga wa Wanyama pori wapewa kifuta jasho

Posted on: June 21st, 2017

Wananchi wawili wa Kijiji cha Mitimirefu kata ya Mitimirefu Tarafa ya Siha Magharibi wamepatiwa kifuta jasho kutoka Wizara ya Maliasili na utalii.

Tukio hilo limefanyika jana katika Kijiji cha Mitimirefu baada ya maofisa wa Maliasili kutoka ofisi ya kikosi cha kuzuia ujangili Kanda ya Kaskazini Arusha walipofika kijiji hapo.

Kifuta jasho hicho kimetokana na uharibifu wa mazao uliofanywa na wanyama pori katika mashamba ya wananchi yaliyopo katika kijiji cha Mitimirefu mwaka 2015 ambapo Wanyama hao waliharibu mashamba ya nyanya na maharagwe.

Wananchi waliopata kifuta jasho hicho walikidhi vigezo vyote vilivyowekwa na Wizara ya maliasili na Utalii ikiwa ni pamoja na shamba la mazao yaliyoharibiwa kuwa umbali wa zaidi ya nusu kilomita kutoka eneo la hifadhi, ukubwa wa eneo lililoharibiwa kuwa heka moja au zaidi.

Mmoja wa wanufaika hao ndugu Joel Nekisa kutoka kijiji cha Mitimirefu aliishukuru Serikali kwa kusikia kilio chao hasa kwa kuwalipa kwa wakati kifuta jasho hicho japo ni kidogo ukilinganisha na uharibifu uliotokea.

Alieleza kuwa yeye na mwenzake Daudi Ndetaulo wamelipwa kiasi cha shilingi laki moja kila mmoja kama kifuta jasho cha mazao yao yaliyoharibiwa na Wanyama pori mwishoni mwa mwaka 2015.

Mkurugenzi Mtendaji Halmashauri ya Siha ndugu Valerian Juwal aliishukuru Wizara ya Maliasili na utalii kwa kufanikisha jambo hilo mapema ambapo limewajengea imani wananchi wa Siha juu ya Serikali yao Sikivu kuhusu masuala mbalimbali ya wananchi.

Alieleza kuwa halmashauri ya Siha kupitia idara ya Ardhi na Maliasili itaendelea kuwasaidia wananchi katika kuwazuia wanyama pori wanaoendelea kuingia katika mashamba ya Wananchi ili kupunguza uharibifu mkubwa unaoweza kusababishwa na wanyama hao.

Napenda kutoa wito kwa wananchi wa vijiji vyote vinavyopakana na hifadhi kuhakikisha kuwa wanashirikiana na Serikali ya Wilaya katika kutoa taarifa pindi wanapoona wanyama pori wameingia katika maeneo yao alieleza Juwal.

Wakati huo huo Serikali imetoa kiasi cha shilingi milioni moja kama kifuta machozi kwa familia ya mtu mmoja aliyeuwawa na Tembo katika Kijiji cha Mitimirefu mwaka 2016.

Wilaya ya Siha imekuwa ikivamiwa na makundi makubwa ya wanyama pori kutoka hifadhi ya wanyama pori arusha na nchi jirani ya Kenya kupitia Wilaya za Londido na Rombo.